Nimin tlai khan Lunglei DRDA Confernce Hall-ah kumin Lok Sabha Election vil tura Election Commission of India in a ruat Expenditure Observer Pu Pradhuman Meena, IRS chuan election expenditure kaihhnawih official-te inthlan hmachhawn tura inpuahchahna a sawipui. Meeting ah hian Lunglei Election Officer Pu James Lalnithanga, Expenditure Nodal Officer Pu M. Misael leh official dangte an tel.

Expenditure Observer Pu Pradhuman Meena, IRS chuan inthlan vuakveta thil thlengte a bik takin sum leh pai senso chelekte chu ECI in ngun taka a vil reng thu sawiin hemi kawnga mawhphurna nei official-te chu inthlana sum senso te mumal taka chhinchhiah turin a chah a. Inthlan felfai tak a awm theih nana expenditure monitoring pawimawhzia sawiin ECI Compendium on Election Expenditure Monitoring chu ngun taka lo zir theuh turin a ngen a. Harsatna an tawhte sawi hrehlo tur leh expenditure kaihhnawih an thil hriatthiam loh te zawt vat thin turin a chah bawk a ni. 

He hunah hian candidate pakhatin inthlan sensova sum a hman theih zat chu Rs. 70 lakhs a ni tih sawi lan a ni a. Campaign leh inthlan kaihhnawiha sum hmanna reng reng felfai zawka chhinchhiah a nih theih dan tur te, a endikna kawngah AEO leh candidate-te inman taka an thawh ho theih dan tur te sawi ho a ni a. Candidate-te sum hman leh AEO record a inmil theih zawkna tura sum hmanna dik taka inhriattir zel a pawimawh thu te, Video Surveillance Team ten uluk taka record an siam a pawimawh thu te leh Expenditure hnuaia team hrang hrang te inpawh tlang taka hna an thawh a tul thu te sawi ho a ni.