Japan International Cooperation Agency (JICA) funding-a NH 54, Aizawl to Tuipang kawngp 2 lane-a zauh turin mipui leh khawtlang a nghawng dan tur zirchianna Social Impact Assessment (SIA) ennawn leh tura Mizoram Land Acquisition, Rehabilitation and Resettlement (MLARR) Act, 2016-in a ruat Expert Group chu vawiin chawhma khan Lunglei DC Conference Hall-ah an thukhawm a. Expert Group Chairman Pu Lallungmuana, Associate Professor, Pachhunga University College chuan kaihruai a ni.

Pu Lallungmuana chuan ramdang mi taima te thawhrimna zara, an hausakna luangliam a thlawna kan dawng tur chu lawmawm a tih rualin, hmasawn tum tak takna thinlung hi kan ram in a mamawh a ni, a ti a. National Highway zauhna project hi dan anga tih a nih dawn avangin mimal induhsakna a leng lo a, a thianghlim in, a phurawm a ni, a ti.

Expert Group atangin SIA Report bihchianna Dr. James L.T. Thanga, Assistant Professor, Mizoram University chuan pein, SIA in a tum chu project lian thiam in mipui a nghawng dan te, a nihphung zirchianga a tlem thei ang bera nghawng neih tir dan te leh kan hloh tur nge kan hlawkpui turin buk rit zawk zirchianna a ni, a ti a. Pi Zoramdini, Asst. Director, Land Revenue & Settlement Department pawhin MLARR Act, 2016 hnuaia a hrut khaw mipuite tana zangnadawmna leh hamthatna dang awm thei te a tarlang a ni.

State Institute of Rural Development (SIRD)-in Social Impact Assessment a neih an zirchianna ah Expert Group te chuan he project hi ram leh mipui tana hmasawnna tura thil tha tak ah an ngai a. He project kaihhnawih harsatna awm thei leh a chinfel dan tur chungchang te sawiho niin mipuite chhawmdawl dan turte pawh sawiho nghal a ni.

Lunglei, Lawngtlai leh Siaha District chhunga he kawng zauhin a nghawng tur khawtin atangin V/C member pahnih theuh te an tel a ni.