No.5685/2020-2021 

India Hnam Pa Mahatma Gandhi pian champha phak puala kum tina buatsaih thin October ni 2-9 awh tur Faina Hapta (Cleanliness Week) 2020 chu Lunglei District tan tukin zing khan Convention centre-ah Bawrhsap Pu V.Lalsangliana, IAS chuan a hawng.

Faina Hapta (Cleanliness Week) 2020 hawnna thusawiah Lunglei DC Pu V.Lalsangliana chuan faina leh hmasawnna chu thil kal kawp tlat an ni a, hmasawnna tluantling nei tur chuan kan khawtlang nunah faina, hriselna leh thianghlimna a pawimawh takzet a ni, a ti. Kan in leh lo, kan chheh vel kan tihfai mai bakah faina lamah kan rilru sukthlek kan siamthat a tul a, mipui rilruah faina kan tuh chuan inhrilh hriat chawp ngai lovin kan fai reng thei dawn a ni tiin khawtlang hruaitu kalkhawmte chu faina kawngah mawhphurhna sang tak an nei tih hre thar turin a chah a.  Faina kawngah mitin ten mawhphurna kan nei theuh a ni tiin hemi kawnga sawrkar hmalakna te phur taka tawiawm thin tur leh sawrkar pawh a tul anga finchhuah thin tura sawmin Lunglei DC chuan faina chu Faina Hapta chhung chauh ni lovin, kum tluana kalpui a, nunpui turin kalkhawmte a sawm a ni.

He hun hi Lunglei DUDO Pu Andrew Lalhruaia’n kaihruaiin Lunglei CMO Dr Lalthlamuana chuan thu sawiin Pu R. Lalhmingliana, Inspector, UD&PA chuan powerpoint presentation hmangin Faina Hapta 2020 intihsiakna leh Mizoram Khawpui Fai Inelna 2020 chungchang kalkhawmte a hrilhfiah a ni.

Kum danga lo tih thin tawh angin Faina Hapta 2020 pual hian faina intihsiakna buatsaih leh tur niin category hrang hrang hengte - sawrkar pisa, school, restaurant/motel, Hotel, Hospital, VC Area/ Veng, Bazar/ Market-te intihsiakna buatsaih a ni dawn a. Faina Intihsiakna ah hian Category thar pakhat dah belh niin motor siamna workshop-te (2 wheeler category & 4 wheller category) chu faina lamah endik an ni dawn bawk a ni. Week kharna (Closing) hi siam hran lovin Ocotber thla chhung hi endik hunah ruat niin 26^th January, 2021 (Republic Day) lawmnaah lawmman sem tur a ni.   

Faina Hapta 2020 hawnna program-ah hian Sawrkar department hrang hrang hotute, Village Council, YMA, MJA, MUP leh MHIP hruaitute an tel a ni.