2344/2024-2025

2024 Khuangchawi thla ni 2: India hnam pa Mahatma Gandhi pian champha phak puala 'Faina Ni' (Swachhata Diwas) hman ṭhin lawmna leh kumina faina beihpui thlak, Swachhata Hi Seva 2024 leh Faina Hapta (Cleanliness Week) kharna chu vawiin khan Convention Centre Hall, Lungleiah Lunglei District Bawrhsap, District Steering Committee on Swachhata Hi Seva Chairman Pu R. Lalṭhazuala hovin hman a ni.

Faina Ni lawmna leh Faina Hapta kharnaah hian Bawrhsap Pu R. Lalṭhazuala chuan District mipuite 'Faina Ni' chibai bukin, September ni 17 aṭanga October ni 2, 2024 inkar chhunga faina beihpui thlaka mawh latu UD&PA leh PHED te leh hma lakna hlawhtlinna kawnga tha thawhtu sawrkar pisa, zirna in, pawl, khawtlang leh mimal zawng zawng chungah lawm thu a sawi a. Faina chu mimal aṭanga inṭan a, zau zawka ṭai darh leh kang kai zel tur a nih angin mi tinin mawha kan lak a pawimawh tih sawiin, mimal kal khawmin mipui a siam a, mipui ṭan rualna aṭangin khawtlang fai a awm thei chauh a ni, a ti a. Ram leh khawtlang faina turin sawrkar leh mipui mawhphurhna a awm tih sawiin, duh ang takin hma lakna chak thei lo mah se, sawrkar tih tur chin chu a kal chho zel dawn a, mipuiin kan tih tur chin hlen chhuak thei tura kan inpuahchah a ngai a ni, a ti a. In chhung leh pawn lama bawlhhlawh paih danah te, bawlhhlawh thliar hran leh thehthang chungchangah te, bawlhhlawh sawngbawlna thlengin mahni mawhphurhnaa inthlahdah bik awm lo tura ṭan rual a pawimawh thu a sawi a. Bawlhhlawh thlahdah chu National Green Tribunal (NGT) leh sawrkar aṭanga lei chawi theihna a nih bakah, leilung boruak tichhe thei leh mipui vantlang hriselna nghawng thei a nih avangin faina tluantling leh huapzo a awm theih nan District mipuite ṭang tlang ṭheuh tura sawmin, kumin Swachhata Hi Seva thupui, 'thinlunga faina tuh ngheh leh nunphunga beh nghehtir' chu tihpuitlin tum turin a chah a ni.

He hun hi Lunglei Municipal Council (LMC) Chief Executive Officer Pu Donny Lalruatsanga'n a kaihruai a. Seventh Day Adventist Lunglei North Bial bialtu Pastor F. Lalbiakliana'n hunserh a hmang a. Lunglei District Urban Development Officer Pu C. Sawihlira'n Swachhata Hi Seva 2024 kalpui chhunga Lunglei khawpui huam chhunga an hma lakna tlangpui tar langin, Public Health Engineering Department Rural WATSAN Division-a Senior Executive Engineer Er Laltlanchhunga'n thingtlang lama an hma lakna a tar lang thung a. UD&PA Lunglei hnuaia faina lama thawktu (sanitation worker)-te chawimawina leh intihsiakna lawmman semna hun buatsaih niin, UD&PA-a Inspector of Sanitation Pi F. Lalruatkimi'n a buaipui a. UD&PA-a Civil Engineer Er K. Lalṭanpuia'n lawm thu sawiin hun a khar a ni.

Vawiina Faina Hapta kharnaah hian sawrkar hna thawkte, khawtlang hruaitu leh tlawmngai pawl hruaitute, Clean Lunglei, Lunglei District Adventure Club leh District MJA member-te, Leitlangpui HSS zirlaite leh zirtirtute leh lawmman dawngtute an tel a ni.

He hunah hian UD&PA hnuaia faina lama thawktu mi 23 te hnenah chawimawina leh lawmpuina thuziak hlan a ni a. Swachh Bharat Cultural Fest buatsaiha bawlhhlawh aṭanga thil ṭangkai siam chhuah (waste to art) pho chhuaktu Self Help Group (SHG) 15 zinga a ti ṭha zual pathum hnenah lawmman pek niin, pakhatna Solomon SHG, pahnihna Creative Moms SHG leh pathumna Zodin SHG te an ni a. Zirlaite zinga, "Faina ni tina nunpui (a ṭulna leh a pawimawhna)" tih thupui hmanga thu inziahsiak (essay writing competition) buatsaihah mi 26-in an thuziak theh lutin, pakhatna Lalchhanchhuaha (III Sem, Govt J. Buana College), pahnihna Lalsangpuia Sailo (I Sem, DIET Lunglei) leh pathumna Vanlalruati (I Sem, DIET Lunglei) te an ni.

September ni 17 leh October ni 2, 2024 inkar chhunga Lunglei District-a Swachhata Hi Seva kal tlanga faina beihpui thlakah hian Lunglei khawpui chhungah UD&PA Lunglei te bul tum leh thingtlangah PHED te bul tumin hma lak a ni a. Khawpui chhungah vantlang hmunhma bawlhhlawh ngaihmawhawm zual then fai tur ruahman (cleanliness target unit - CTU) pariat (8) awmin, thingtlangah hmun li (4) a awm a. Khawpui chhunga mite hi phungbawm hrang hrang - Baptist HSS, Lunglei District Adventure Club, YMA Rahsiveng Branch, YMA College Veng Branch, YMA Theiriat Branch, NSS Mizoram Polytechnic Lunglei, Clean Lunglei, LMC, District Sainik Welfare & Resettlement Office leh Mizoram Ex-Services League Sub-Headquarters te nen tihfai niin, thingtlang lama CTU Ṭhaizawl, South Khawlek, West Rotlang leh Zawlpuiah te khawtlang mipuite nen faina hnatlang thawh a ni bawk.

Local Council leh Village Council-te hma laknain vantlang faina hnatlang koh ṭhin niin, chhungkua, sawrkar pisa leh zirna in te'n an remchan danin faina hnatlang an thawk bawk a. Lunglei leh Mualṭhuam North-ah te Cultural Fest buatsaih niin, khua/veng hrang hrangah faina inzirtir nana intihsiakna chi hrang hrang bakah, kawng zawh, thu tiam, vantlang inkhawm, thing phun, in tin tlawh chhuah leh khawlai then fai hnatlang te buatsaih a ni a. Faina lama thawktute hriselna endikna buatsaih niin, Lungleiah bawlhhlawh paih lohna hmun puan thar a ni bawk a. Swachhata Hi Seva kalpui chhung hian Pathianni tih lohvah chuan ni tin faina kawnga hma lakna hrang hrang kalpui a ni.