2345/2024-2025

Siaha the 2nd October 2024: UD&PA leh PHE Department tangkawp buatsaih Mizoram Cleanliness Week Closing Function & Swachh Bharat Diwas 2024 chu vawiin khan MADC Golden Jubilee Hall, Siaha-ah hman a ni a. He hun hi Pi S Lalmuanpuii, Sr LAO, LAD, MADC chuan kaihruaiin Pu. Abraham Beirazi Khithie, Addl DC chu Khuallian a ni. Cleanliness Week denchhana Category hrang hranga buatsaih inelna lawmman sem nghal bawk a ni.

Khuallian Pu Abraham Beirazi khithie chuan kum dangah chuan India Hnam Pa, Mahatma Gandhi Piancham denchhanin October ni 2 a Cleanliness Week hman tan thin a nih thu a sawi a, kuminah erawh Sawrkar ruahmanna in September Ni 25 atanga hman tan a ni, a ti. Zalenna sual chhuaktu ropui, Mahatma Gandhi piancham denchhana faina hapta hman thin a nih chhan chu Hnam Pa, hruaitu ropui tak a nih vang nilovin faina lama thawh hlawk tak, faina ngai pawimawh em em a nih vang a ni a, a rilru leh hmathlir tawmpuitu nih tum theuh turin Kalkhawmte a chah. Pu Abraham Beirazi Khithie chuan faina lamah Sawrkar in hma a la nasa hle a, scheme hrang hrangte duangin intihsiaknate pawh a buatsaih fo thin a, hmasawnna hmuh tur tam tak awm mahse duhkhawp lohna erawh a la tam hle a, khawpui fai, thianghlim leh mi te entawntlak khawpui a lo nih theih nan tan ho a pawimawh thu a sawi a, faina kawngah chuan mitin huang khatah kan awm tiin kan mawhphurhna theuh hre thar leh turin a chah bawk.

Khuallian Addl DC chuan Mizoram chuan tourism industry-ah theihna (potential) nasa tak a nei a ti a, India ram chhung bakah ram dang atang te pawhin tlangram boruak thengthaw nuam taka cheng kan nihna zarah tourism tih hmasawn a pawimawh hle a, khualzin hip tur chuan faina tho a pawimawh tiin Mizoram hmasawnna innghahna pawimawh tak a ni a ti. Kalkhawm mipuite, a bikin VC te chu a ṭo bula thawktu tak tak an ni tiin mahni veng theuh a lo hrisel zawk a, a lo thianghlim zawk nan theihtawp chhuahpui turin a sawm a ni.

Siaha District Swachhta Nodal Officer, Sr EE PHED, Pu Viasai Solo pawhin thu sawiin mitinin kan nitin nunah Faina hapta hmang thin ila a duh thu a sawi a, kar khat chhungin nitin kan in leh a vel, kan rilru leh ngaihtuahna tih fai nan hmang thin ila Siaha khawpui fai tak a chhuah theih ngei a rin thu a sawi. Faina chu hriselna a ni (Sanitation is health) ti bawkin Siaha District fai leh hrisel kan neih theih nan Bawlhhlawh seng hawi kawngah fimkhur theuh ila a ti a, Khaw fai leh thianghlim chu a zahawm a, hmuh a nuam a, rilru leh ngaihtuahna a ti hlim veng veng thei ti bawkin hmun fai zah thiam a, ti bal tu leh ti hmelhemtu ni lo turin rilru thar nen theihtawp chhuah theuh turin kalkhawmte a chah bawk a ni.

Cleanliness Week puala Category hrang hranga Inelna buatsaih lawmman semna hman nghal a ni a, lawmman dawngtute chu a hnuai a tarlan te hi an ni.

1. WASTE TO ART
1st Prize- S Lalramengi
2nd Prize- T Genevieve
3rd Prize- Ramdingmawii

2. School
(a) Lower Level (Class X and below)
1st Prize- Joel Public School
2nd Prize- Govt Primary School-I, Meisatla
3rd Prize- Maraland Academy

(b) Higher Level
1st Prize- Maraland Theological College
2nd Prize- Don Bosco School
3rd Prize-Govt Saiha College, Siaha

3. Office
1st Prize- Public Health Engineering Department
2nd Prize- District Medical Superintendent Office
3rd Prize-Legal Metrology

4. Church
1st Prize- New Siaha Local Church, ECM
2nd Prize- Bethel Local church, ECM
3rd Prize- College Vaih Local church, ECM

5. Public Toilet
1st Prize- College Vaih Near AOC
2nd Prize- New Siaha Bazar Shed
3rd Prize- Meisatla -I

6. Locality
1st Prize- New Siaha East -I
2nd Prize- New Colony -5
3rd Prize- Siahatla -1

7. Best Sanitation Worker
1st Prize-Zudi
2nd Prize- Dachhia
3rd Prize- K Beikhai

8. Painting & Poster
1st Prize- Zipawri Solo, Class- 8, DBS
2nd Prize- Kathleen B Dino, Class- 8, DBS
3rd Prize- Thezi T Azyu, Class-7, DBS

9. Restaurant
1st Prize- Sweet Corner
2nd Prize- Doulas Restaurant
3rd Prize- Oasis Restaurant

10. Market
1st Prize- College Vaih Market
2nd Prize- Meistla Market
3rd Prize- Lorrain Market te an ni. Lawmman hian citation bakah pawisa fai a keng tel bawk.

Cleanliness Week Closing programme-ah hian Siaha District Cleanliness Ambassador-a ruat mi 3 te hnenah momento hlan nghal niin Ambassador 2 te hnen atangin thusawi ngaihthlakna hun hman a ni a, Pu Vanlalchhuanliana, DPO, UD&PA chuan lawmthu sawina a nei bawk.

Vawiin programme-ah hian Mizoram sawrkar hnuaia Head of Office te, MADC Executive Secretary leh mi pawimawh dangte bakah Siaha khaw chhunga NGO hrang hrang aiawhte an tel a, Rev Dr Setha Solo, Maraland Theological College Principal chuan tawngtaina neiin vawiin hun chu tih tawp a ni.