2346/2024-2025

Saitual, the 2nd October, 2024: Vawiin dar 11:00 am khan UD&PA leh PHED tangkawp buatsaih faina beihpui thlakna- 'Swachhata Hi Seva, 2024' hmawr bawkna leh 'Swachh Bharat Mission' kum 10 tlin lawmna- 'Swachh Bharat Diwas 2024' chu YMA Zawlbuk, Keifang Venghlui Saitualah neih a ni a, District Bawrhsap Dr. Lalngura Tlau chu khuallian niin hun a hmanpui.

He hunah hian khuallian chuan vawiina an hun hman chu faina beihpui thlakna tawp kharna ni loin an hmalak tawhnate lawmna a ni zawk tih a sawi a. Saitual district-ah chuan khaw 40 ( urban-ah 7, rural-ah 33) leh VC 40 an awm a, hun chep tak kara activity 353 lai mai an nei thei chu lawmawm a tih thu sawiin, he faina beihpui thlakna hlawhtlin theih chhan chu khaw mipuite leh VC te thawhrimna leh tanrualna vang a ni, a ti. Khuallian chuan kumin Swachhata Hi Seva 2024 thupui chu "Swabhav Swachhata, Sanskar Swachhata” faina nunpui a nih thu a sawi a, kalkhawmte chu faina kawngah mawhphurhna an nei theuh tih sawiin, faina beihpui chu khar mai loa nunpui chhunzawm zel turin a chah nghal a ni.

He faina beihpui thlakna hi thuang hnih Urban (khawpui) leh Rural (thingtlang) ah te then a ni a, activity hrang hrang - Office, zirna in leh khawtlang hmunhma tihfai hnatlang, hmun bal zual (black spot) zawn chhuah leh tihfai, kawng zawh (rally), thingphun (plantation drive), Swachhata quiz, faina thuthiam (Swachhata pledge), cultural festival leh bawlhlawh sawngbawltute hriselna endikna (Health checkup for sanitation workers) te neih a ni. Rural lam Nodal Officer Pu Lalzuala Sailo, SDO, PHED atangin an hmalakna hrang hrang ngaihthlak a ni a, Urban lama hmalakna hi Pu VL Hruaitluanga, SBM (Urban) Coordinator atanga ngaihthlak a ni.

Faina beihpui thlakna pual hian intihsiakna hrang hrang buatsaih a ni a, Pu Zohmingliana, IEC Specialist, PHED, Saitual Sub-Divisiob leh Pi R. Zodinmawii, Work Supervisor, DUDO office, Saitual ten lawmman semna hun hi an kai hruai a ni. Lawmman dawngtute chu a hnuaia kan tarlante hi an ni.

Village council fai ber intihsiakna:

1.    Ruallung

2.    Saitual Venglai

3.    Saitual-III

Essay inziahsiak:

1.    Malsawmhlui, Class XII (Arts), Govt. Saitual Higher Secondary School

2.    C. Lalawmpuii, 5th Semester (Mizo Department), Govt. Saitual College

3.    Esther Lalmalsawmi, 3rd Semester (Political Science), Govt. Saitual College

Waste to Art competition:

1.    Ruthi Vansangpuii, PWD Veng, Saitual

2.    Lalsangliani,Rulchawm

3.    H. Lalremmawia, Rulchawm

Swachh Bharat Diwas 2024 hi Urban area Nodal Officer, Dr. Abert Vanlalliantluanga, DUDO, Saitualin a kai hruai a, Department hotute, VC aiawhte leh NGO aiawhte an tel a ni. He hun hi Pu Samuel VL Nunhluma SBM (Gramin), Coordinator PHED in lawmthu sawinain a khar a ni.