2347/2024-2025

Dated Kolasib the 2nd October, 2024 : Vawiin khan Kolasib District-ah ‘Swachhata Hi Seva’ Closing  Function  Kolasib DC Conference Hall-ah -hman a ni a, Kolasib DC Pu Robert C. Lalhmangaiha chuan he hun hi kaihruaia, ‘Swachhata Hi Seva’ hmalakna kal hun chhunga hnathawhte thlirhona neih a ni.

September ni 15 atanga October ni 2 thleng daih tur Faina leh Thianghlimna chungchang inzirtirna leh hmalakna Programme 'Swachhata Hi Seva' chu vawiin October ni 2 khan India hnampa Mamatma Gandhi a piancham denchanin a kharna hun hman a ni a. Kolasib District-ah chuan District Urban Development & Poverty Alleviation Department (UD & PA) Department leh Public Health Engineering Department (PHE) tangkawpin Kolasib District-a hmun hrang hrangah ‘Swachhata Hi Seva’ Programme hi kalpui niin, vawiin khan he Programme hmawrbawkna hun hman a ni.

DC chuan he hunah hian ‘Swachhata Hi Seva’ Programme hlawhtling taka hman a ni thei chu a lawmawm a tih thu sawiin, a hlawhtlin theih nana hmalatu Department-te an fakawm thu a sawi a. DC chuan “Inpumkhata inlungrual taka hmalakna chuan rahtha a chhuah thin” tih thu sawiin, hmasawnna kawnga hmalakna hrang hrang a hlawhtlin theih nana theihtawpa Sawrkar thawhpui thintu mipui bakah Village Council, Sawrkar leh Private Office, School leh NGO hrang hrangte thawhhona chu fakawm a tih thu sawiin, ‘Swachhata Hi Seva’ Programme pawh a hlawhtlinna chu an thawhhona zar a nih thu a sawi. DC chuan ‘Swachhata Hi Seva’ Kharna hun an hman tak chu, “Faina kawnga hmalakna kharna ni lovin, Faina kawnga kan harhtharna leh tan kan laktharna hun a ni” ti a vawng reng turin he hun kalkhawmte chu a chah nghal bawk.

PHE Department-a, Senior EE, Pi Lalrosangi  leh District Urban Development Officer, Pi Josephine Zonunsangi te chuan he hunah hian ‘Swachhata Hi Seva’ Programme hnuaia hmalakna : Swachhata Worshop, Swachhata Run, Swachhata Gram Sabha, Black Spot Identification, No-Tolerance Day for Single use plastic and No littering day, Wall Painting, Door to Door Campaign, Plantation Drive, Mass Scale Cleanliness Drive bakah hmalakna hrang hrang an kalpuite Report an pe a. Heng hmalaknate hlawhtling taka neih a nih theih nana Sawkar Department hrang hrangte thawpna an dawng tha thin chu lawmawm an tih thu an sawi a. Khawtlang hruaitute leh mipuite’n Faina leh thianghlimna kawnga Sawrkar hmalakna an ngai pawimawh thin chu a lawmawm an tih thu a sawi bawk.

Vawiin a ‘Swachhata Hi Seva’ Programme kharna hun hmannah hian Kolasib District chhunga Faina kawnga inelna lawmman - Citation leh sumfai semchhuah a ni a. Kolasib District chhunga khaw fai intihsiakna-ah Saiphai thlan niin, Veng fai berah Kolasib College Veng thlan a ni a. High School leh a chung lamah Fai intihsiakna ah School of Nursing, Thingdawl thlan niin Primary leh a chunglamah Govt. Thingdawl Middle School-in lawmman an dawng bawka. Heng bakah mimal faina kawnga hmalatu leh thahnem ngaite tan lawmman pekchhuah a ni bawk.