2348/2024-2025

Dated Serchhip, the 2nd October, 2024: Vawiin khan Serchhip DC Pu Paul L.Khuma hoin Serchhip DC Pisapui Hall ah Swachhata Hi Seva kharna inkhawm neih a ni.

DC Pu Paul L Khuma chuan faina beihpui Swachhata Hi Seva kharna inkhawm hmangtute chibai bukin fai a pawimawhzia leh kan nunpui tur a nihzia zirtirtu ni turin a sawm a. Faina beihpui hi nitin, kartin, kumtluanin kan hmang tur a ni, a ti a. “Fai hi keimahni theuhah bul i tan ang u”, tiin kalkhawmte a sawm a ni.

Swachhata Hi Seva hun hman chhung September 17 atanga October 2, 2024 chhungin inelna hrang hrang buatsaih niin vawiin program ah hian lawmman sem a ni a. Serchhip khawpui chhunga veng fai inelna ah Vengchung Village Council chu veng fai berah thlan a ni. Best Performing Village Council (hma la tha leh hnatlang thawkchhuak tam) lawmman pakhatna dawngtu chu Hmar Veng VC niin pahnihna P&E VC, pathumna Chanmari VC te an ni.

PHE Department buatsaihin Swachhata Hi Seva neih chhunga faina kawnga hma la tha ber khaw pathum thlanchhuan an ni bawk a. Pakhatna chu Vanchengte niin, pahnihna Keitum, pathumna Chhingchhip Venghlun te an ni.

Serchhip Town area chhung ah hmun bal zual tihfai tur Blackspot hmun nga tihfai a ni a. Blackspot tifai tha berah Chhiahtlang North VC te thlan an ni.

High School leh Higher Secondary School level essay writing competition ah lawmman pakhatna dawngtu Hmingthankimi (Presbyterian English School), pahnihna R Lalrinsiami (Goodwill English Academy), lawmman pathumna dawngtu Vanlallawmzuala (Chhiahtlang Higher Secondary School) te an ni a. Elementary School level ah pakhatna lawmman dawngtu Vanlalhriathlui (Little Flower Convent School), pahnihna Isabella Lalmalsawmi (Goodwill English Academy), leh pathumna Zonunmawii Sailo (Little Flower Convent School) te an ni.

High School & Higher Secondary School level painting competition ah lawmman pakhatna Zodinpuii (Goodwill English Academy), pahnihna V Lawmsangkimi (Presbyterian English School) leh pathumna K Vanlalhmangaihthanga (Goodwill English Academy) ten an dawng a ni. Elementary School level ah pakhatna Lalhmangaihhlui (Chawngbuangi Memorial School), pahnihna Vanlalhlimpuii (Little Flower Convent School) leh pathumna Vanlalrempuii (All Saints School) ten lawmman an dawng a ni.

Government Serchhip College ah reels competition neih a ni bawk a. Pakhatna -Youth Adventure Club, pahnihna - Wildlife Protection Club, pathumna - Drug Awareness Club te an ni.

Thil chhia paih mai tur atanga thil tha leh hman tlak siam chhuah Waste to Art Exhibition neih nghal a ni a. Serchhip DC Conference kawtah he exhibition hi neih a ni.

Swachhata Hi Seva Faina beihpuiin a ngaihpawimawh em em te chu bawlhhlawh paih fai leh thianfaitu Safai Mitra te an ni a. Vawiin chawhma dar 11 atang khan Safai Mitra te tan a thlawna inentirna Health Camp chu DC Complex ah neih a ni bawk.

Program hi Addl. DC Pu Lalrinzuala'n a kaihruai a. DUDO  Dr Marilyn Lalruatkimi’n presentation a pe a, veng fai endiktu Serchhip District MJA aiawhin President Pu C Lalhminghlua’n report a pe  a.SDO (Sadar) Pi F Lalnisai’n lawmthu sawiin hun hnung a khar a ni.