No.3827/2021-2022

Aizawl, 27th January, 2022: Vawiin khan Lunglei District Agriculture Office leh Agricultural Technology Management Agency (ATMA) Lunglei te tawngkawp buatsaih ni hnih awh (27th & 28th January, 2022) Farmers Mela chu Rahsiveng Community Hall ah Lunglei DC Pu Kulothungan A in a hawng.

He Farmers Mela hi Soil Health Card Scheme kaltlanga ruahman niin Agriculture and allied department-te bakah ATMA, KVK Hnahthial, Sericulture, Florist Association, Lead banks te leh Agripreneurs Ieh Progressive farmers hrang hrang ten an thlai thar leh bungruate entirin mipuite lei theihin an chhawp chhuak a ni.

Hawnna program Lunglei DAO Pu C. Malsawmkima kaihhruaiah Lunglei DC Pu Kulothungan A chuan hawnna thu sawiin kuthnathawktute tharchhuah ti pung tur leh awmze nei zawka hma an lak theihnan kuthnathawktute, bank-te leh Line Department hrang hrang te inkarah inpawhtlang taka thawhhona (coordination) tha a awm a tul a ni tiin heng stakeholders pawimawh zawng zawngte kalkhawmna Farmers Mela chu a hlu takzet a ni, a ti a. Thlai leh thei rah te tharchhuah mai piah lamah a vawn that dan te, sawngbawl zel dan te leh ram danga hralhchhuah zel dan tur kawngah te kuthnathawktute kan zirtira kan ngaihtuah pui a tul a ni tiin ramchhung hmun dangte angin kuthnathawktu pawl anga intelkhawma hmalakna (farmer cooperative) te tun aia uar zawka kan kalpui ve a tha a ni, a ti. Covid-19 hrileng karah Lunglei District kuthnathawktute leh a kaihhnawih Department-ten theihtawp an chhuaha, hma an la tlang chu chhuanawm a tih thu a sawi bawk.

Pi Baby Lalremkimi, Asst District Agriculture Officer chuan Farmers Mela thiltumte leh ruamhan a nih dan tlangpui report a pe a. Dr David Fangzauva, Block Agriculture Officer chuan lawmthu sawina hun a hmang a ni.

Farmers Mela hawnna neih zawh hian dawr hrang hrang te fan kual a ni a. Thlai thar chhuah chi hrang hrangte phochhuah a nih bakah loneituten thlai huan enkawl chungchang leh Kissan credit chungchang a an harsatna te zawh fiah theih turin mithiam ten an thut chilh bawk. He mela ah hian Vety Clinic awm tel bawkin, vaccination programme kalpui nghal bawk a ni.

Soil Health Card Scheme hi Department of Agriculture hnuaiah Model Village hrang hrangah kalpui a ni a. Lunglei district chhunga kan leilung/lei hriselna dinhmun(Soil fertility status) hriatchian nan lei endikna (Soil testing) kalpui a, lei leh thlai in a mamawh ang tawk recommendation siam zel a ni. Mela ah hian mipuiten leitha chungchang te leh lei endik pawimawhna te an lo hriatchian lehzual nan ruahmanna siam a ni a. Uluk zawk leh dik zawk a lei an enkawl theih nan te, leitha leh pesticides te dealer (approved) te hnen atang ngei a an lei theihna turte, an huan/ lo lei dinhmun chiang zawk a an hriat theihna tur leh uluk zawk a an enkawl theihna tur a thiamna, hmanrua leh hriatna tha zawk an neih theih nan he programme hi duan a ni.

Hawnna inkhawm ah hian Line Deparment hrang hrang thawktute, Lead Bank hotute leh kuthnathawktute an kal khawm a. Ni 2 awh tur Farmers Mela hi a duh apiang tan chhim theih tura buatsaih a ni.