Films Division, Ministry of Information and Broadcasting, Govt. of India chuan January 30-February 7, 2017 chhung hian Cultural Heritage Centre, Lungleiah film siam zirna (film-making workshop) a buatsaih dawn a. He workshop-a tel duhte chuan lungleidipr@gmail.com kal tlangin Lunglei District IPRO Pu Vanlalmuana hnenah emaw, jjoshy@gmail.com kal tlangin I&B Films Division-a Deputy Director General (I/C) Pu Joshy Joseph hnenah emaw dilna theh luh tur a ni.

Films Division chuan heti ang workshop hi kum 2014 khan a tum khat nan Aizawlah a lo nghat tawh a. Aizawl bakah hian hmun dang pathum – Silchar, Dimapur leh Agartala ah te pawh a lo buatsaih tawh a ni. Kolkata leh Mumbai atanga mi thiam lo kalte kaihhruaina hnuaiah ni 9 chhung hian scripting, story-boarding, shooting, sound recording leh editing te a bul thum zir thiamtir hman tum a ni a. Zirtirna hi saptawng hmanga kalpui tur niin, workshop-a telte chu India sawrkar hmingin participation certificate hlan an ni ang.

He workshop hmang hian mite'n cinema kal tlanga an rilrua thu awmte an pho chhuah thiam nan a bulthut atanga zirtir tum a ni a. Heti ang workshop-a film siam 6 leh a siamtute chu Mumbai International Film Festival (MIFF) 2016-ah khan chhuah tura sawm an lo ni tawh a. Tun tum "MIFF in Lunglei cum film-making workshop"-a candidate-te’n film an siam tur pawh hi MIFF 2018-ah chhuah leh theih beisei a ni.

Thalai leh kum upa deuh tawhte pawh, photography, music, literature, acting, writing, etc. lama tui tawh phawt chu he workshop-ah hian sawm vek kan ni a. Workshop leh heta film pahnih siam tura senso zawng zawng hi Films Division-in a tum vek dawn a; mahse, thlenna bakah, ei leh in man chu mahnia intum vek tur a ni thung ang.

Sumit Ghosh (editing), Adinath Das (camera), Hari Kumar Pillai (sound) leh Joshy Joseph (Director) te hi zirtirtu tur an ni a. Ravi R-a enkawl mi pariat awmna technical support team an lo kal tel bawk ang. Local Co-ordinator atan Pu Napo Thanga (Mob.-8414870254) chu ruat a ni.