Vawiin khan State Climate Change Cell, Mizoram Science, Technology & Innovation Council (MISTIC), Directorate of Science & Technology te leh Mizo Photographers' Society (MPS) te tangkawpin an buatsaih Photography Competition on Climate Change lawmman semna chu Directorate of Science & Technology Conference Hall-ah neih a ni. He hun hi Pu Samuel Lalmalsawma, Senior Scientific Officer-in a kaihruai a. Pu Armand Malsawmdawngzela, Secretary, MPS chuan he intihsiakna buatsaih a nih dan te a sawifiah a ni.
Dr. R.K. Lallianthanga, Chief Scientific Officer chuan intihsiakna buatsaih a nih chhante sawiin Science & Technology hnuaia awm State Climate Change Cell chuan sik leh sa inthlak danglam zelin kan ram a nghawng dante nasa takin a zirchian mek thu a sawi a. Khawvel sik leh sa inthlak danglam zelin kan ramah pawh nghawng a nei nasa ve ta hle a, ruah sur mumal lo te, ei leh bar tharchhuahna kawngah te, hriselna lam thuah te leh kawng dang chi hrang hrangin min nghawng thu a sawi a. India ramah Prime Minister ho a hmalaknain sik leh sa inthlakin mipuite a nghawng nasa lutuk tur lak ata invenna atan National Action Plan on Climate Change (NAPCC) siam a ni a, chumi hnuaia National Mission for Sustaining the Himalayan Ecosystem hnuaiah Mizoram pawh nasa taka hma lak chhoh mek a ni tih a sawi. Climate Change chungchanga mipuite hrilhhriatna (awareness programme) atana Photography Competition buatsaih a ni chu a lawmawm hle a, hetiang lam inhrilhhriatna hi tun aia nasa zawka uar chhoh zel tum a ni a ti.
He thlalak intihsiaknaah hian mi 26 an tel a, thlalak hrang hrang 76 a lut a ni. Lawmman dawngtute chu heng mite hi an ni:
1st Prize : M.S. Dawngliana, Ngopa
2nd Prize : H. Hmingchungnunga, Armed Veng South, Aizawl
3rd Prize : l) Richard Zothankima Hrahsel, Chhinga Veng, Aizawl
2) Malsawmtluanga, Tuikhuahtlang, Aizawl
Lawmman semnaah hian Mizorama thlalak lama tui mite leh Department lam mite an tel a ni.
