Vawiin hian Serchhip District Level Committee on National Social Assistant Programme (NSAP) te chu an Chairman Dr. Lalrozama, IAS, Serchhip Bawrhsap ni bawk hovin an thukhawm a, Tuikum Assembly Constituency MLA Pu Er. Lalrinawma pawhin tel puiin Serchhip District chhunga National Family Benefits Scheme dawng thei turte an ngaihtuah.

Chairman Dr. Lalrozama chuan, National Family Benefits Scheme chu chhungkuaa eizawngtu berte an boral avanga chhungkaw baihvai te tanpuina tura sawrkar laipui siam a nih thu leh, District tinte chuan kum khata he tanpuina dawng thei tur zat bituk, Census 2011 a District chhunga mihring awmzat atanga chhutchhuah a awm thu a sawi a. Kumin atana Serchhip District in a pek theih zat chu mi 12 te hnenah a nih thu a tarlang bawk.

MLA Er. Lalrinawma pawhin National Family Benefits Scheme chu chhungkaw eizawngtu ber boral avanga a kalsan chhungkaw baihvai mangangte tuamhlawmna programme a ni a, a hlu hle a ni. District chhunga a diltu, dawng awm tak takte ngeiin dawng thei se a pawimawh a ni, tiin a sawi.

Kum 2016-17 chhunga Family Benefits Scheme Serchhip District chhung atanga diltu hi E. Lungdar CDPO bial atangin 7 leh Serchhip CDPO bial atangin 6, an vain mi 13 an awm a, vawiina meeting hian heng zinga a dawng awm chhungkaw 12 te an thlang chhuak ang a. Chung chhungkua an thlan chhuahte chuan tanpuina Rs. 20,000.00 theuh an dawng dawn a ni.