National Social Assistance programme (NSAP) hnuaia scheme pakhat National Family Benefit Scheme (NFBS)a tanpuina dawng thei tur thlangin vawiin khan DC Conference Hall, Kolasib-ah District Level Committee for Implementation of NSAP Scheme an thu.

Committee hi Pu R.Lalremsanga, Addl.DC hovin an thu a. Serlui bialtu MLA Pu K.Lalrinthanga, Parliamentary Secretary chu Committee member anihna angin meeting-ah hian a tel a. National Family Benefit Scheme hnuaiah hian Kolasib District-ah mi 15 hnenah Rs.20,000/- theuh pek turin sorkar laipui chuan sum a rawn pe a, mizoram pum tan hian mi 197 hnena sem turin sum hi pek a ni a. Vawiin a District Level Committee thu hian dilna lut atangin tanpuina dawng tur te hi an thlang a, Bilkhawthlir ICDS hnuai atang mi 8 leh Thingdawl ICDS hnuai atang mi 7 tanpuina dawng turin an thlang a ni.

National Family Benefit Scheme hnuaia district tina tanpuina dawng thei zat hi 2011 chhiarpui a district a mihring awmzat atanga chhut a ni a. He tanpuina hi chhungkua a eizawngtu ber, kum 18 aia naupang lo leh 59 aia upa lo, a boralin, a kalsan tak a thawhchhuah ringtu ten Social Welfare Department-ah dil theih a ni a. Dilna hi mahni khaw bialtu CDPO, ICDS Project hnenah thehluh theih reng a ni a, dilna hi chhungkaw eizawngtu ber boral atanga kumkhat ral hma zela thehluh theih a ni a. Diltu hi Below Poverty Line (BPL) chhungkua an ni tur a ni.

Vawiina tanpuina pek tur thlan chhuah te hi chhungkaw eizawngtu ber kum 2015 chhung leh a hnulama boral ta, enkawl te an ni.