3494/2022-2023

Lunglei the 6th February, 2023 - Vawiin khan Lunglei District Level Committee on Fire Prevention (DLCFP) buatsaihin Fire Prevention Week (Kangmei Ven Hapta) 2023 hawnna hun chu Convention Centre-ah Lunglei DC & Chairman, DLCFP Pi Ramdinliani, IAS hovin hman a ni.

Kumin Fire Prevention Week thupui chu "Thapui thawhin kangmei chhuak tur i veng ang u" niin Week hi February Ni 6-10 chhung hman a ni ang.

Lunglei DC & Chairman, DLCFP Pi Ramdinliani chuan khua a lo thalin mitinte kangmei lakah kan fimkhur zual a tul takzet a ni tiin mihring, in leh bungrua, ramngaw leh nungchate kang mei laka kan him tlan theihnan District mipuite chu ni tin khawsak phungah kangmei tichhuak lo tura fimkhur turin a chah a. Kangmei chhuak avangin harsatna kan tawk leh fo thin chu a pawi takzet a ni tiin kan ram leilung kan enkawl danah kan in enchiana, a thalo lai te kan siam that a tul a ni tiin March ni 15, 2023 ral hma ngeia lo/ huan leh leipui hal hman turin District mipuite a chah a. Kangmei ven leh Ramngaw leh nungchate humhalh chu Forest Department chauh mawhphurna a ni bik lo a ni tiin sawrkar Department hrang hrangte convergence a thawkho tura hma la turin a chah a. Ramngaw leh nungchate humhalhna kawngah mitin ten mawhphurna pawimawh tak kan nei theuh a ni tiin Lunglei DC chuan ramngaw leh nungcha humhalh pawimawh zia a hre tu mai nilo a, a taka nunpuitu leh midangte zirtirtu nih theuh tum turin kalkhawmte a sawm a ni.

Pu PC Lalchhandama, Member Secretary District Fire Prevention Committee & DFO Lunglei chuan report a pe a. Nikum 2022 khan District Fire Prevention Committee vawi hnih neih a ni a. Forest Survey of India-in Fire Monitoring System a duan chhuah hmangin Lunglei District-ah kangmei chhuahna (Fire points) 277 a rawn hmu chhuak a, 442.98 hectares huam a ni a. Heng hi a hmunah endik vek an nih hnuah hmun 272 chu lo hall eh a kaihhnawih an ni tih finfiah an ni a, 441.58 Ha a huam a ni. A bak hmun 5 te chu ram kang niin pawi lian tham zawk a thlen hmaa thelh mih an ni. VC, NGO, Frontline Workers, Frontline workers-te, kohhran leh Zirna in kaltlangten Awareness campaign te neih a ni.

Vawiin program hi Pu R. Lalrochama, Honorary Wildlife Warden in a kaihruai a. Pu Rongura Hrahsel, MFS (Rtd) in powerpoint presentation hmangin zirtirna pe in, Pu Zothanzuala Hnamte, Secretary, Sub Hqrs YMA Lunglei in thusawina hun hmangin Lunglei DLAO Pi Carolyn LB Khiangte in lawmthu sawina hun a hmang.

Fire Prevention Week 2023 puala Photography Competition buatsaih lawmman semna hun hman niin lawmman dawngtute chu:

Pakhatna – Lalduhsangi Fanai, Zotlang

Pahnihna – J Lalramdina, Ramthar

Pathumna – Lalrinmawia, Venglai