3493/2022-2023

Kolasib dated 6th February 2023: Thapui thawhin Kangmei chhuak tur i veng ang u' tih thupui a hmangin kum 2023 Kangmei ven Hapta chu vawiin khan Kolasib Parish Hall ah hawn a ni a. Kolasib DC Pu John LT Sanga chuan khuallian niin Kangmei ven Hapta hi a hawng.

Pu Thanliana Hauhnar, ACF Kolasib kaihhruaiah hian Kolasib DC Pu John LT Sanga chuan kumin Fire Prevention Week thupui, 'Thapui thawhin Kangmei chhuak tur i veng ang u' tih chu Forest Department-te thawh tur chauh a kan dah chuan awmzia a neih dawn loh thu sawiin thawhhona tha tak neih a tul thu a sawi a. Kolasib District tih hmasawn nan thapui thawh a beih ngai pawimawh tak a awm thu sawiin chungte chu Kangmei ven te, AIDS do leh Faina lama hmalakna te a nih thu a sawi.

Ram kang awm chhan chi hrang hrang a awm theih thu Pu John LT Sanga chuan sawiin a tam zawk chu fimkhur loh vang leh inthlahdah vang a nih thu a tarlang a. Kangmei vanga chhiatna thleng thei tam zawk chu fimkhurna leh thuawihna hmangin a pumpelh theih thu a sawi. Kolasib DC chuan ram kang vanga harsatna thleng thei thil hrang hrang sawiin boruak a tihbawlhhlawh bak ah boruak tha siamtu, nungchate chenna ram ngaw, thing leh mau nasa takin a tih chhiat theih thu a sawi bawk a ni. Kolasib DC chuan ram hmasawnna tur atan chuan a chhung a chengte an pawimawh thu leh a chhunga chengten hmangaih tak a kan enkawl loh chuan a tuartu tur chu keimahni bawk kan nih tur thu sawiin ram leilung hausakna humhalh chu mitin mawhphurna a nih thu a sawi.

Pi Margaret Lalramchhani DFO chuan report a pe a, Kum 2021 ah Kolasib District ah hmun 361 ah kangmei a chhuak a, 2022 ah Kangmei chhuak hi hmun 300 ah a awm thu sawi a. Hetih lai hian 2021 ah ram kang zau zawng hi 323.71 Hectare a nih laiin 2022 ah hian 464.99 Hectare a kang a. Kangmei chhuak tlem zawk mah se ram kang a zau zawk thu a sawi.

Pu C. Liankunga Vice President, Sub Hqrs YMA pawhin thu a sawi a. Fire Prevention Week pual a Photo Exhibition neih a lawmman late hnenah Kolasib DC Pu John LT Sanga chuan lawmman a hlan nghal bawk a ni. Lawmman latute hi 1-na Pu David LC, College veng, 2-na Pu Lalhmahruaia, Diakkawn niin 3-na hi Pi Saizikpuii, Diakkawn a ni.