No.1946/2021-2022

Aizawl the 21^st August, 2021 -  India ram zalenna ni vawi 75-na tlin hriatrengna leh lawmna puala zalenna sualtute leh zalenna nei tura beihna hrang hrangte hriatrenga chawimawi nan, Nehru Yuva Kendra Sangathan (NYKS) Lunglei chuan ‘Azadi Ka Amrit Mahotsav’ hnuaiah programme hrang hrang a kalpui mek zel a. He hmalakna kal zelah Fit India Mission hlawhtlin theihna kawnga rahbi pawimawh tak  Fit India Freedom Run 2.0 chu vawiin khan Lunglei District hmun hrang hrangah neih niin District headquarter-ah Deputy Commissioner Pu Kulothungan A hova neih a ni.

Covid-19 inkaihhruaina tha taka zawm chungin he hun hi kalpui niin, thalai, thalai hruaitute, sportspersons te an tel a ni.

Lunglei Bawrhsap Pu Kulothungan A chuan taksa insawizawi leh hrisel tura tan lak a tul thu sawiin, thalaite chu hriselna kawng zawh tura theihtawp chhuah tur leh taksa insawizawi ngai pawimawh tlat turin a chah a. Taksa hrisel chuan rilru hrisel a siam a, hlawhtlinna tinrengin a umzui thin a ni, a ti bawk.

Pu David Lallawmsanga, District Youth Officer, NYKS Lunglei chuan hlawhtling taka Fit India Freedom Run 2.0 neih a nih theihna kawnga tel zawng zawngte chungah lawmthu a sawi a. District Administration leh ‘Azadi Ka Amrit Mahotsav’ hmalaknaa rawn pen chhuak khawtlang hruaitute, tlawmgnai pawlte  chungah lawmthu sawiin, thalaite chu an nitin nunah taksa sawizawi ngai pawimawha turin a fuih a.

Azadi Ka Amrit Mahotsav hnuaia Fit India Freedom Run hi India ram pum huap khua leh tui tam zawkte tel theihna tur, India ram hrisel leh thalaite hriselna ngai pawimawh chunga duan a ni a. August ni 13 atanga October ni 2, 2021 chhunga hman tur a ni a. Thau lutuk, nguaina, rilru hah leh natna dangte ven kawnga hmalakna niin, khawi hmun leh engtik hunah pawh mahni insawizawia tlan hi chawilar zel tur ani tih thupui hmanga neih a ni. August ni 13  khan India ram pum tan Union Minister of Youth Affairs and Sports Shri Anurag Thakur chuan Fit India Freedom Run 2.0 tlangzarhin ram chhung hmun hrang hranga District 744 tuam chhuak tura ruahman a ni. He freedom run ah hian taksa hriselna enkawl chungchang leh khua leh tui te impumkhatna chungchanga infuihna, pledge sawihona leh cultural activity dangte neih a ni.