No.1947/2021-2022

Aizawl, the 21st August, 2021: Vawiin chawhnu dar 1:00 khan Pu C.C. Lalchhuangkima, Deputy Commissioner kaihhruaiin Khawzawl District Disaster Management Authority leh Khawzawl Town chhunga VLTF aiawhte chu September ni 4, 2021 thlenga Khawzawl District-a Covid-19 inkhuahkhirhna hman tur ngaihtuahin an thukhawm.

Vawiina DDMA leh Khawzawl Town VLTF te meeting-ah hian Khawzawl District
Bawrhsap Pu C.C. Lalchhuangkima chuan sawrkar, VLTF leh mipui ten hun rei tak an lo thawhrim tawhna zarah Khawzawl District chu Covid-19 hrilengah dinhmun duhawm takah ding rih mah se, inthlahdul leh inthlahdah theih a la ni lo a ti a. Hrileng vanga mipuiin harsatna an tawhte ngaihtuah chungin, hrileng darh zel loh nana ruahmanna siam thei tura ngaihtuahna seng turin kalkhawmte a sawm a ni.

Khawzawl District-a Covid-19 inkhuahkhirhna hman tur zingah hian Biakina inkhawm chungchang ngaihtuah niin, District Headquarters pawn Covid-19 active case awm lohna khuaahte chuan Village Level Task Force ten an khaw dinhmun thlira inkhawm theih ni a an ngaih chuan Deputy Commissioner hnenah dilna thlen se ti a rel a ni a. Phalna neite chu Pathianni chawhma leh chawhnu inkhawm theih niin, inkhawm phalna hmunahte chuan Covid-19 inkaihhruaina kengkawha viltu tur Covid-19 SOP Implementation Committee din vek nise tih a ni. Hmun dangahte chuan August thla chhung ngaihchan phawt nise tih a ni bawk.

SOP hman mek-a gym hawn chungchangte, sports practice leh zing/tlai exercise lak chungchangte tihdanglam hret hret a ni a. District-a Covid-19 hrileng dinhmun thlir chungin Anganwadi hawn chungchang leh sawrkar hnathawk Executive Duty-te duty dan pawh siam danglam a ni bawk a ni.

Tun dinhmunah Khawzawl District-ah Covid-19 positive hmuhchhuah tawh zawng
zawng chu mi 113 niin, heng zinga mi 94 chu mipa an ni a, hmeichhia 19 an awm tawh bawk. Positive zinga mi 109 te chu dam takin CCC leh 4C atangin an chhuak tawh a, Covid-19 vanga boral an la awm lo a ni. Active case mi palite hi mipa, phai atanga hna thawk tura rawn lut khunghrante an ni. 



Attachment

  • Loading attachment...