2597/2022-2023
Lunglei the 10th November, 2022 – Ni thum awh (November ni 10 atanga November ni 12) lung lam leh cancer natna a thlawna inentirna ‘FREE CARDIOLOGY & ONCOLOGY HEALTH CAMP’ chu vawiin khan Civil Hospital Lunglei OPD-ah neih tan niin Lunglei DC Pu Kulothungan A in a hawng.

Hawnna inkhawm tawi Civil Hospital Lunglei OPD-a neihah Lunglei DC Pu Kulothungan A chuan hlawh phut miahlova a thlawna mipuite enkawl tura Lungleia kalkhawm Doctor leh Nurse te chu zahna chibai bukin an chungah lawmthu a sawi a. Free Health Camp neih mek chu hemi kawnga hmalakna bultanna chauh a ni tiin hmalakna kalpui chhunzawm zel anih tur thu leh phai lama zai ngai te pawh a tul anga buaipui chhunzawm zel an tum thu a sawi a ni.

Free Health Camp hi Deputy Commissioner’s Office, Lunglei District hmalaknaa Corporate Social Responsibility kaltlanga neih niin Lung leh Cancer natna Specialist doctor leh medical lam mithiam mi 15 rual an lo kal a. Cardiology lama kum 30 chuang lo thawk tawh, Dr. J S N Murthy, Senior Cardiologist & Head of Cardiology, Sri Ramachandra Medical College and Research Institute, Chennai leh Dr Ravi Kannan R, Surgical Oncologist, Director of Cachar Cancer Hospital and Research Centre (CCHRC) te bakah Specialist doctor engemawzat an rawn kal a ni.

Free Health Camp hi Lunglei Civil Hospital OPD ah neih niin screening lo ti lawk te tan November ni 10 ah hian inentirna buatsaih a ni a. Inentir duh dangte tan November ni 11 & 12 ah te a duh apiang inentir theihna hun hawn a ni bawk. He hun ah hian Lunglei District chhung mipui mai bakah District dang mipui a duh apiang te inentir theih a ni.