2596/2022-2023
Khawzawl, the 9th November, 2022: Khawzawl District Election Officer Pu C.C. Lalchhuangkima, District Bawrhsap chuan vawiin chawhnu khan Special Summary Revision of Photo Electoral Roll, 2023 neih tur atan Draft Electoral Roll, 2023 siam chu Kawnzar Polling Station Govt. Primary School, Kawnzar Vengah a tlangzarh a, political party aiawhte hnenah electoral darft roll bu hi a sem chhuak nghal a ni.

Pu C.C. Lalchhuangkima chuan electoral roll dik leh rintlak neih theih nana Election Official-te hmalakna bakah NGO leh political party-te tawiawm thinna fakawm a tih thu sawiin, District dang leh hmun danga harsatna an tawh thin kan tawk ve lo a, kan vannei hle a ni, a ti. Mawhphurhna hrang hrang neite chu electoral roll dik leh felfai nei tura theihtawp chhuaha fimkhur tur leh felfai taka hma la turin a chah a ni.

He hunah hian bialtu BLO bakah Political party, Sub Headquaters YMA leh MJA aiawhte an tel a. Heng bakah hian Vengthar South, Zaingen leh Hermon Polling Station-ahte ERO leh AERO te'n Draft Electoral Roll hi an tlangzarh bawk a ni.

Draft Electoral Roll 2023, Khawzawl District tlangzarh takin a tarlan danin Khawzawl District chhunga Assembly Constituency 1, 22-Tuichang AC huamchhunga Polling Station 28 ah vote nei mi 17,242 (mipa 8,622 leh hmeichhia 8,620) an awm a, mipa vote nei 2 in an tam zawk a ni. Khawzawl Vengthar North Polling Station huamchhungah vote nei tam berin 1,023 an awm a, vote 114 awmna Arro Polling Station huamchhungah vote nei an tlem ber a ni.

Special Summary Revision of Photo Electoral Roll, 2023 ah hian qualifying date chu January ni 1, 2023 a ni a, hemi ni a kum 18 tling hman tur India khua leh tui (citizen) dik takte tan Electoral Roll-a inthun dil theih a ni a, hemi rual hian siam that ngai siam, paih ngai paih leh insawn duhte siam fel theihna hun pawh hawn a ni a. Ruahman dan chuan Special Summary Revision of Photo Electoral Roll 2023 kaltlang hian November ni 9, 2022 atanga December ni 8, 2022 chhungin Claims and Objection - Electoral Roll-a inthun, paih, insawn leh siam that, dilna thehluh theih hun chhung hawn a ni a, hemi hun chhung vek hian a remchan dan angin hearing neih chhoh zel a ni ang. December ni 26, 2022 atangin dilna leh rawtna thlente chinfel a ni ang a, database siamthat leh supplement chhutchhuahte tihfel a nih hnuah January ni 15, 2023 hian Electoral Roll thar ber tlangzarh tum a ni.

Vawiin vek khan Special Summary Revision of Photo Electoral Rolls (SSR), 2023 denchhena District Election Office, Khawzawl District buatsaiha Slogan Writing Competition lawmman semna hun chu Election Officer Pu James Lalnithanga kaihhruaiin DC Conference Hall-ah hman a ni a. Lawmman hian certificate leh pawisa a keng tel a, lawmman dawngtute chu hengte hi an ni:

A) Category -I (18 years and below)
Pakhatna: Vanlalrova, Zuchhip Veng (Vote hmanga i aw chhuah thei turin, Electoral Roll-ah inziaklut ang che)
Pahnihna: K. Lalhmingmuani, Darngawn Veng (I chanvo dik tak i chan theih nan, Roll-ah chuang ve rawh)
Pathumna: Vanlalremruatpuia, Arro Veng (I vote hmangin rorelna dik siam rawh)

B) Category -II (Open)
Pakhatna: Zothanmawia, Hermon Veng (Tapchhak zawl atanga sawisel ai chuan, i vote hmang ngeiin aw)
Pahnihna: Zawlhmingthanga, Zuchhip Veng (Lo vah nan chem, ram siam nan vote)
Pathumna: LP Vanlalruati, Vangtlang (Vote la, i hlutzia lantir rawh)

Hemi hnu hian BLO training neih chhunzawm nghal a ni.