908/2022-2023

Association of Surgeons of Mizoram, North East Chapter of Association of Surgeons in India leh Indian Society of Anesthesiologist-Mizoram State Branch te tangkawp buatsaihin June ni 15 leh 16 (Wednesday & Thursday) hian Civil Hospital Lunglei leh Christian Hospital Serkawn ah te a thlawna zai runpui — ‘Free Surgical Camp’ buatsaih a ni. Hemi puala Civil Hospital Lunglei Conference Hall-a hun hman chu Lunglei HPC Vice Chairman Pu Lawmawma Tochhawng chuan vawiin khan a hmanpui a ni.

Lunglei HPC Vice Chairman Pu Lawmawma Tochhawng chuan thu sawiin Association of Surgeons of Mizoram leh an thawhpui ten midangte damna tur a, mahni insengso a hun an hmang chu a Pathian hlu hle tih sawiin Civil Hospital Lunglei leh Christian Hospital Serkawna zai lam thiammi Doctor an indaih loh em em lai leh zai mamawh tak tak mi tamtak an awm lai a, chhawk zangkhai tur leh mi harsate tan man lova inzai hna an rawn thawk chu ropui a tih thu sawiin , mi tamtakin damna an lo chan zel theih nan leh an kal zelna tura duhsakna hlan chungin HPC Vice Chairman chuan he programme hi a hawng a ni.

Dr. Saia Chenkual, President ASM pawhin he programme hmang tura an inbuatsaihna chung chang sawiin rei tak tawh atanga ruahmanna awm tawh a nih thu leh hmun hrang hrang leh pawl hrang hrang atanga thawhpuitu leh mimal an thiamna leh hun senga thawhpuitute an awm chu vanneih thlak a tih thu sawiin YMA day a nih anga midangte tana thil tha tih chu he hun an hman nen hian inhmeh hlea a hriat thu a sawi a ni.

‘Free Surgical Camp’ ah hian Aizawl lam atangin Surgeon, Anesthesiologist (hnimhlum specialist) leh supporting staff chi hrang hrang, machine technician te nen mi 40 vel lo thawk phei in, Lunglei lama thawktute nen tang hovin damlo zai runpui (free surgical camp) hi an nei dawn a ni. Heng mithiam rual lo kal te hian an kalna te, thlenna leh ei man zawng zawng an in tum vek dawn a ni.

He Free Surgical Camp-ah hian major operation vek tih tur a ni a, Laparoscopic Cholecystectomy (verh a mit paih) tur mi 8, Cancer leh Kal thalo leh lungte zai te leh zai chi dang te nen a vaiin Civil Hospital Lungleiah mi 15 zai tura buatsaih tawh an ni a, Christian Hospital Serkawnah zai tur mi 8 tih fel tawh bawk a ni. A verha mit paih (Laparoscopic Cholecystectomy) hi Civil Hospital Lunglei ah a vawikhat tihna tur a ni.