909/2022-2023 

Aizawl, 15^th June, 2022 : Dr R. Lalthangliana, Health & Family Welfare, Commerce & Industries leh Higher & Technical Education Department changtu Minister chuan vawiin khan a chenna veng “Kanan branch YMA, Aizawl” in Chawngvawr Resort, Chawnpui Venga YMA Day pual inkhawm an buatsaih chu hman puiin, YMA memberte chu midangte tana malsawmna thlentu leh mi harsate tanpuia chhawmdawltu an nih avangin an taksa hriselna ngai pawimawha, engtik lai pawha in fit taka awm reng turin a chah.

Dr R. Lalthangliana chuan YMA te hnathawh hi sawi ngai lovin kan hre vek a, tlaivar a ngaih changte, thlan laih a ngaih changte, khawtlangah khuarel chhiatna a lo thlen changte, damlo buaipui ngai leh khawsak harsa chhawmdawl ngai an awm changte hian YMA hi kan rilruah a lang hmasa ber a, YMA tih tur bik hi ziaka dah vek a ni lova, mahse kan tih tur hre sa vek ni si Mizo thalaite kan ni hi a ropuiin kan mawhphurhna hi a zahawm hle a ni, a ti a. YMA member ten an mawhphurhna tha taka hlen turin taksa leh rilru hrisel neih a ngai a, hemi atana kan insumna turte, kan tih tur leh tih loh turte kan thliar thiam a ngai hle a ni,  a ti.

YMA anga pawl ropui leh tangkai, khawtin leh vengtin dapa pawl tupawh huap ang chi hi India ram chu sawi loh, khawvelah pawh hian an awm lo tih sawiin YMA danglam bikna leh inenkawlna tha tak hi thangtharte tan leh khawtlang tan a hlu em em a ni, a ti a. Damlo a mamawhtute tana YMA branch hrang hrang ten a thlawna thisen an pe thin chu lawmawm a tih thu a sawi a, midangte nunna chhanna tura YMA hnathawh hi a ropui takzet a ni, a ti.

Kanan Branch YMA ah hian Section pali awmin YMA member zawng zawng hi 2326 an ni a, YMA Day denchhen hian khawtlang huap hnatlang vawi hnih an nei tawh a, tukin khan an branch huam chhunga khawsak harsa zual chhungaw 8 hnenah tanpuina cheng 5000/- theuh an pe a, vawiin hian futsal hmanga inelna an buatsaih bakah Mizo infiamna chi hrang hrang hmangin inelna an buatsaih tel bawk a ni.