3618/2024-2025

2024 Pawltlak thla ni 19: Sawrkar laipui ruahmanna anga December ni 19 - 24, 2024 inkar chhunga Good Governance Week hman tur leh 'Prashashan Gaon Ki Ore Campaign' kalpui tur chu vawiin khan Lunglei District tan District Bawrhsap Pi Navneet Mann chuan Lunglei DC Conference Hall-ah a hawng a. Hemi pual hian BDO Office, Lungleiah mipuite'n harsatna an thlenna tur leh an mamawhnaa awlsam zawka sawrkar an dawr theihna tur hun buatsaih a ni bawk.

Good Governance Week hawnnaah Lunglei District Bawrhsap Pi Navneet Mann chuan sawrkar chu mipuite tana awm a nih thu leh sawrkar hna thawkte pawh mipui rawngbawl tura rawih an nih thu sawiin, ram hmasawnna a awm theih nan sawrkar inrelbawlna ṭha a awm a pawimawh thu a sawi a. Sawrkar hna thawkte chu an thawhsak mipuite tan dawr nuam leh ṭanpuitu nih tum zel tura chahin, mipuite hamṭhatna tura sawrkar ruahmanna hrang hrang pawh a chhawr tur mipuite leh thingtlang kilkhawr zawka mite'n an chhawr theih nan theih tawp chhuah turin a chah a ni.

He hunah hian DC office-a officer-te leh staff-te telin, mipui tana ṭangkai leh ṭha zawka hna thawk tur leh inrelbawlna kalpui tura infuih tharna hun hman a ni.

Good Governance Week hi December ni 25, 'Good Governance Day' beh chhana ruahman niin, tun ṭum hian thingtlang mipuite lam hawia hma lakna nasa zawk kalpui tum a ni a. Lunglei District-a a bul ṭan nan vawiin khan BDO Office-ah sawrkar department hrang hrangte chuan awlsam zawka mipuite'n anmahni an dawr theihna tur hun hawngin, mipuiin an harsatna an thlenna tur te, aadhaar inziah luh leh siam ṭhatna te, mipui hamṭhatna scheme hrang hranga inziah luhna leh a thlawna hriselna dinhmun endikna (NCD screening) te buatsaih a ni.