3617/2024-2025

Dated Aizawl, the 19th December, 2024: Vawiin khan State Veterinary Polyclinic Hospital, Khatla-ah Vety. Hospital bika a hmasa ber turin ran entir turte computer hmanga ziahluhna, computerized registration chu Dr. F. Lalramhluna, Addl. Director (VS&PH), AH& Vety. Department chuan a hawng a, ran entir turte ziahluh nan hman nghal a ni.

Dr. F. Lalramhluna chuan Polyclinic Hospital-in an mahni thahnemngaihna avanga hmasawnna an nei leh ran entir turte'n felfai taka registration an ti thei tawh tur chu lawmawm a tih thu a sawi a. District Headquarters-a Veterinary Hospital-ahte pawh hman ve thuai a beisei thu a sawi bawk.

He hun hi Dr. PC Lalsangzuala, Joint Director (Polyclinic) chuan kaihruaiin ran entir turte tan rang zawk leh awlsam zawka registration an tihna tura a bika siam software hmanga computerized registration tih a nih thu a sawi a. Record felfai tak a awm theih tawh dawn thu leh hei hian report siam leh ran natna hri zawnchhuahte, ran enkawl dan tur leh ran damlo zat hriat chianna kawngahte nasa taka thawktute a puih thei dawn thu a sawi bawk.

Computerized registration software hi Romei Dynamics-te siam a ni.