3616/2024-2025

Dated Aizawl, the 19th December 2024: Vawiin khan Secretariat Conference Hall ah Pu B. Lalchhanzova, Minister enkawl department te hnathawh ennawnna (Review Meeting) Chief Minister Pu Lalduhoma hova neih a ni.

Chief Minister chuan, "Review Meeting hi thil dik lo zawng hrim hrima buatsaih kan ni lo va, kan harsatna leh kan mamawh te, chak zawk leh tha zawka hna kan thawh theih nana inrawnkhawmna te a ni zawk. Supply department leh Revenue department hnate hi a hautak a, an pawimawh si a, thawktute pawh inpe taka thawk turin kan beisei che u a. Supply lam hian Ration card dik leh rintlak tak neih lo tum ula, sawrkar document pawimawh takah chantir kan duh a ni," a ti. "Review Meeting minute hi in bawhzui tha em tih kan rawn ngaihven leh dawn a, kan thil sawiho te tha takin in lo bawhzui dawn nia," tiin a chah bawk.

Pu B. Lalchhanzova, Minister chuan Chief Minister chungah lawmthu a sawi a. Kum khat chhunga a department te hmalakna lian zualte a tarlang.

Food, Civil Supplies & Consumers Affairs department hnathawhte chu Pi Saizikpuii, Director, FCS&CA chuan a pho chhuak a, sawihona an nei zel a:

1. Card var neiten a man to va buhfai an leu atangin sawrkarin thla tin Rs. 3.84 crore vel a hum thei.

2. LPG Home Delivery hi Serchhip khawpuiah tha taka kalpui a ni tawh a, district capital dangah pawh bultan tawh an ni. Aizawl veng 29 ah kalpui tawh niin veng 53 dangah a then lai kalpui a ni. LPG Distributors zawng zawngten kum thar atangin veng pahnihah home delivery an kalpui belh leh vek ang. Zothan Indane chuan an operation area-ah home delivery hi an kalpui vek tawh thung.

3. Monsoon stock tha taka kalpui a nih avangin kuminah ruahtui tla tamin rei mah se buaina engmah a thleng lo va. Nakkum monsoon stock tur hi January thla atanga kalpui tan leh tur a ni.

4. Buhfai phurtu contractor hi main route ah 55 leh district route ah 108 an awm mek a. A phurh manah hian Main route ah April - December, 2024 chhungin Rs. 2503.75 lakh leh district route ah Rs. 2047.10 lakh sen tawh a ni. NFSA buhfai phurh nan hian central chuan quintal khatah Rs. 105 zel a rawn tum thin.

5. Hill State Transport Subsidy, Rs. 26 crore lai hun rei tak FCI in a bat tawh chu Chief Minister hian a theih ang anga a bawhzui tur thu a tarlang.

6. Vehicle Pollution test-na hi petrol pump tina dah theih a nih leh nih loh te, pump hrang hrang inhmantawm theih coupon system duan theih dan lo dap tur tein a chah.

Heng bakah hian inhnaih tak taka Godown tam lutuk tihtlem thu te, Permanent Fair Price Shop sak thu te, buhfai buk dik tak mipuiin an dawn theih nana ruahmanna siam mek te, weigh bridge tlo zawk neih theih dan tur te, thawktute awmze nei zawka sem rual thute leh thil dangte an sawi a ni.

Hemi zawh hian Land Revenue & Settlement hnathawh enpuina a neih chhunzawm leh a, a ngaimawh zual thuhma a sawi hnuah Pu Vanlalmawia, Secretary, LR & S chuan an hnathawh dan chipchiar tak a sawi a, sawihona an nei zui zel a:

1. Mizoram pumpui hmun thuma thena hmun khat pawh survey a la ni lo. Land Registration hi state dang te sum hnar lian tak a ni a, Mizoram sum hnar lian takah chantir tum ve mek a ni.

2. Kumin November ni 5 a Chief Minister-in a hawn tawh e-ram chu Common Service Centre atanga dawr theih tura tihfel thawkhat a ni tawh a. Kum thar atang chuan uar taka he application hi hman an tum.

3. LSC nei kher lo va ram neitu nihna dan RoR (record of right) department-in a duang mek. Record of Right computerize theih an neih zawng zawng (359331) chu an computerised vek tawh a, digitally signed property card 1155 an pe chhuak (issue) tawh. Cadastral survey an neih tawhna, geo reference nei fel vek, Unique Land Parcel Indentification Number (ULPIN) an pek theih tawh hi 94154 a ni.

4. Cadastral Survey kalpui a nih hmaa survey lo neih tawhna ram te kha cadastral survey neih nawn leh vek a ngai. Aizawl, Lunglei, Champhai leh Serchhip district te resurvey fel tawh a ni. Kolasib, Mamit leh Saitual resurvey fund nghah an nghak mek.

5. Kum 2022-23 khan AMC area tan online tax payment kalpui tan a ni tawh a. Nakkum financial year atangin district zawng zawngah kalpui tan tum a ni. Land valuation rate hi kum 10 liam taa siam a ni tawh a, ngaihtuahna thar an nei mek.

6. Stamp & Registration fee atang hian tun sawrkar kum kal mekah November thlengin Rs. 8 .58 Crore hmuh tawh a ni.

7. Revenue Court neih dan dap chhoh mek a ni.

Heng bakah hian Revenue department hmalakna te, an hmachhawp leh thil pawimawh dang dang te chipchiar takin an sawi bawk.

Review Meeting a neihpui department thawktute hian, Chief Minister-in an dinhmun, an harsatna leh hmasawnna tura an ngaimawh tinreng sawi theihna hun tha a siamsak avangin an lawm hle tih an sawi a. Meeting hian min tiphur a, inpawhna tha zawk min siam a, kan hlawkpui hle a ni, tiin lawmthu an sawi.

Chief Minister hi Pu TBC Lalvenchhunga, Adviser to CM, Pu Vanlaldina Fanai, Commissioner & Secretary to CM, Pu Ramchuana, Addl. Secy, Finance leh CM official dangten an tawiawm a ni.