3615/2024-2025

Dated Thingdawl the 19th December 2024: Vawiin khan Thingdawl Agriculture Farm ah Lei (Soil) tellova Alu chi thar chhuahna (Aeroponic System of Potato Seed Production) chu Pu P.C.Vanlalruata, Agriculture and Farmers Welfare Department changtu Minister chuan a hawng a. He hun hi Pi Ramdinliani IAS, Special Secretary to the Govt of Mizoram ,Agriculture & Farmers’ Welfare Department in a Kaihruai a, Pu Lalfamkima, Deputy Speaker, Mizoram Legislative Assembly, chuan Khualzahawm niin a hmanpui bawk.

Khuallian, Pu PC Vanlalruata, Minister, Agriculture and Farmers Welfare Department chuan thu sawiin, vawiina an Project chu Agriculture Department tana rahbi ropui tak a ni, a ti a. Alu chi tha an thar thei zel a nih chuan Alu chingtuten Alu chi tha an indaihlohna nasa takin a phuhruk sak dawn a, an hlawkpui hle dawn a ni, a ti. Vawiina an Project hawn tak chu Agriculture Department mai nilovin Mizoram tana Mel lung phunna pawimawh tak pakhat a ni, a ti a. Amaherawhchu a khawl leh hmunhma te peihfel in awm mahse a thawktuten an enkawl that loh chuan an tum ang in hlawhtlinna an hmu dawn lova, chuvang chuan a thawktuten an vei angai takzet a ni, a ti. Minister chuan he Project hlawhtlin theih nana an tha leh ngaihtuahna sengtu zawng zawng chungah lawmthu a sawi bawk.

Pu Lalfamkima, Deputy Speaker, Mizoram State Legislative Assembly pawh in thu sawiin Alu chi siamchhuahna khawl tunlai Technology hmang Project hawn theih a a awm chu lawmawm a tih thu a sawi a. Mizoramah Project tha tak tak hawn a lo awm tawh thin a, amaherawhchu a nihna tur anga enkawl zui a nih loh avangin rauhsan a zuihral ta a awm nual a ni, a ti. Chuvang chuan a enkawl zui na lamah inpekna nen theihtawp an chhuah a ngai a ni, a ti a. Sawrkar hna thawk ten an hna ah an inpek a pawimawh zia sawi zuiin, Sawrkar hnathawkte chuan ram hmangaihna rilru pu a , Sawrkar in a dahna hmun a lungawi taka awm a, inpekna rilru nen hna an thawh a ngai a ni, a ti.

Hun Kaihruaitu Pi Ramdinliani, IAS, Special Secretary to the Govt of Mizoram ,Agriculture & Farmers’ Welfare Department chuan Vawiin a Alu chi tharchhuahna Production Unit an hawng thei chu lawmawm a tih thu a sawi a. Technology leh thiamna chhawr tangkai hian hmasawnna te pawh a chak a ni, a ti . An Project chu Alu tharchhuahna lama Technology hman piah lamah Sawrkar in Agriculture a ngaih pawimawh zia tilangtu pakhat a ni, a ti. Aeroponic System chu ram dang te pawh in an lo hlawhtlin pui tawh a nih avangin risk la sang lutuk anga an in ngaih loh thu a sawi a, amaherawhchu a hlawhtlin theih nan uluk taka enkawl a ngai thung a ni, a ti.

Dr Samuel Lalliansanga , DeputyDirector, Agriculture and Farmers Welfare Department in Technical report a pe a. Aeroponic System of Potato Seed Production Project chu North Eastern Council atanga 100% Funding a nih thu a sawi a . An Project an kalpui chhan sawiin, Mizoramah Alu chin hun season ah ching thin mahse a chi dahthatna an neih that tawk loh avangin a chingtute tan chi mamawh ang tawk a awm thin lova. Chuvang chuan Alu chi tha awlsam zawk leh indaihzai zawka an neih theih nan a ruahman a ni, a ti.

Report a tarlan a nih angin NEC atang hian he Production Unit atan hian cheng Nuai 198 (Rs.198 Lakh) Sanction a ni a. Project hna thawktu hi Blue Stallion Equipment(P) ltd, Ludhiana anni . Thingdawl a Aeroponic System hmang hian Kum khat ah Season khat ah Alu chi ( mini tuber)Nuai 2.5 (2.5 Lakh) tharchhuak thei tura beisei a ni a. Kum khata Season hnih an kalpui thei a nih chuan chi (mini Tuber), nuai 5 (5 Lakh)lai tharchhuak thei tura beisei a ni bawk.

Aeroponic system hi Lei (Soil) tellova Alu thar chhuah dan a ni a. Alu (plant) chu Tissue Culture lab ah dah a sawngbawl a nih hnuin Aeroponic Production Unit ah lak phei a ni anga. Chutah chuan Alu chi tiak in a zung a siam chu lei si lovin an khai thin a. Chung a zung an khai chu lei(soil) hmang lovin Tui leh Alu in a mamawh tur chaw tha(nutrients) te khawl hmangin an phuh (Spray)thin a ni. Hetiang hmanga Alu thar hi a hrisel duhin hmun leh lei renchem nan a tha em em bawk a, hmun zim te atangin hlawk takin an tharchhuak thei thin a ni.

Vawiin Program ahhian Minister hian Aeroponic Potato Seed Production Unit building bakah Tissue Culture Laboratory building a hawng a. Pu Lalringliana, Jt Director Agriculture and Farmers Welfare in lawmthu sawina a neih zawhin hun tihtawp a ni.