3614/2024-2025

AIZAWL; the 19^th Decemer, 2024: Vawiin chawhma  dar 11:00 khan PHE Minister Prof.Lalnilawma chuan kan hmalawka krismas leh Kumthar huna Aizawl khawpuiin tui a mamawhna san belh tur lo phuhruk dan tur ngaihtuaha rel ho turin PHE hotute a office chamber-ah a meeting pui.

Kumin May thlaa Remal Cyclone tleh avanga Aizawl Greater Water Supply Phase I&III (37 MWD-SIPMIU) a chhia a. Phase -I chu November thla-ah khan siam that fel a ni tawh a. Tunah hian Phase- III hi siam mek a ni a, Phase -III atang hian nitin tui 10 Million litre pump thin a ni. Chutiang a ni mek lai chuan November thla tawpah khan Greater Aizawl Water Supply Scheme Phase- II pumping line Chawnga Road, Khatlaah siam a nih leh avangin tui pump Ni 2 chhung a khaih lak leh a ni. Ni hnih-khat tui pump a khaihlak hian tui sem hi kar khat vel a nghawng thin a, hei hi mipui lam hian hre thiam lovin, Electric Line a chhiat a, siam that ve leh Power Supply a pek leh nghal mai thei ang hian, sem chhunzawm leh nghal thei mai turin an beisei thin a, hei hi tui semah chuan a theih loh thu meeting-ah hian sawichhuah a ni.

December atangin Aizawl Water Supply Scheme Phase - I leh Phase- II chu tluangtakin pump theih a ni ta a. Nikhatah 28.0 MLD tui pump chhuah char char a ni tawh a ni. Amaherawhchu tunah Aizawl khawpuia mipui 3,80,000 vel awm anga chhutin 35% loss nen tui 70 LPCD a chhutin nitin tui mamawh hi 35.0 MLD (35 Million litre) a ni a.

Aizawl Water Supply Scheme Phase - I leh Phase - II atang chuan tui mamawh hi a pe seng lo ta hle rih a ni. Hei bakah hian Aizawl khawpui chhungah Biak In 320 chuang a awm a, Krismas leh Kumthar chhung hian chawh rualin litre 30000 tui mamawh ang an ni a.  Hemi atana tui mamawh belh hi litre 96,00,000 vel a ni.

PHE dept. in theitawp chhuahin AGWS Phase-III siam that hna a thawk mek a. Krismas hma chuan an siam zawh theih an beisei thu an sawi.  Lo siam tha  hman loh pawh ni se, Krismas leh Kumthar huna Biak In a hman tur ang chu November thla atang khan Biak In  Tuizemah tlem tlemin an lo dah khawl  lawk tawh thu tarlan a ni.

Tunah hian Aizawl khawpuiah hian tui connection 81,632 a awm mek a. Greater Aizawl Water Supply Scheme Phase - I leh Phase II tluang taka tui pump a nih hian public connection-te hi thlakhatah a tlangpuiin tui vawi hnih pek theih thin a ni. Kumin kum bul lama 37.0 MLD (SIPMIU) pump chhuah theih a nih lai khan he scheme atang hian nitin tui 10.0 MLD pump chhuah niin, hei pawh hian Aizawl khawpui tui mamawh a rawn tiziaawm khawp mai a. Aizawl khawpuiah tui vawi thum te pawh sem chhuah hman a ni.

Aizawl khawpui tan hian tui pump-na pumping scheme pathum (3) a awm mek a.

Chungte chu:

1. Greater Aizawl Water Supply Scheme Phase I, 10.8 MLD (Nikhata 10.8 Million Litre pump thei)

2. Greater Aizawl Water Supply Scheme Phase II, 24.0 MLD (Nikhata 24.0 Million Litre pump thei)

3. Augmentation of Aizawl Water Supply and Construction of 37.0 MLD Water treatment Plant (SIPMIU)(37.0Million Litre pump thei)

PHE Minister Prof.Lalnilawma hian Aizawl khawpuiin tui hniang hnar taka a hmuh theih nan ngaihtuahna a seng nasa hle a. Tukin zing dar 7:00-ah pawh khan 37 MLD Water Treatment Plant, Setlak a mi chu tlawhin,a thawktu te chu tha thlah lova, arang thei ang ber hna zawh tum turin a hrilh a ni. Heng bakah hian PHE Minsiter hmalakna in tui leak reporter application pawh siam a lo ni tawh a, he application hi Aizawl khawpui a PHE tui leak nasa lutuk tih zia awmna tur a ni. He application hi Google App atang a download theih a ni a, he application kaltlang hian PHE tui pipe leak hi mipui te'n an report mai theih a, he application nasa leh zual zawk a hmangṭang kai turin PHE minister chuan mipui te a chah bawk a ni. (https://play.google.com/store/apps/details?id=com.josh81191.WaterLeakReporter)

PHE Minister chuan PHE tui pipe phum dan kawng ah tun aia ṭha leh fimkhur zawk a hnathawh a ṭul thu te, pipe phum a nih dawn pawn PWD nen a thawh ho a thul thu te a sawi.