3613/2024-2025

Aizawl dated 19th December 2024: Tukin khan Pu K. Sapdanga, Minister, Urban Development & Poverty Alleviation Department leh Prof. Lalnilawma, Minister, Public Health Engineering Department-te chuan State Investment Programme Management & Implementation Unit (SIPMIU) hnuai a hmalakna a Aizawl khawpui chawm tur a Setlak, Tanhril a ’37 MLD Water Treatment Plant’ sak chu an tlawh a. Er. Lalrothanga, E-in-C chuan hnathawhna kalpui dan tlangpui sawifiahin a hmunhma te a fan pui a ni.

UD&PA Minister Pu K.Sapdanga chuan tui chu mi tin mamawh a nih bak ah mihring hriselna thui tak innghahna a nih avangin PHE Department kaltlangin mipuiin tui thianghlim leh hnianghnar an dawn a pawimawh thu a sawi a, chutih rual chuan tui renchem nachang inzirtir tel a tul thu a sawi. Setlak a 37 MLD Water Treatment Plant kaltlang a Aizawl khawpui ina tui thianghlim a mamawhna sang zel phuhru tur a ruahmanna a awm chu lawmawm a tih thu a sawi.

Prof. Lalnilawma, PHE Minister chuan kumin fur ruah tui tlak tam avangin Tlawng tui lianin Water Treatment Plant-a tui hip luhna ‘Intake Well’ motor a chim chhiat thu sawiin tun ah siam that a nih tawh thu leh enchhin turin naktuk hian ‘No Load Test’ kalpui a nih tur thu a sawi a. Leimin leh lei tla hniam avanga pipe chhia leh tui put awm theihna hmun endik hna kalpui mek a nih thu PHE Minister chuan tarlangin tui pump hna kalpui chhunzawm leh thuai a nih theih nan thawktute chu hna tha tak a kalpui turin a chah.

37 MLD Water Treatment Plant, Setlak, Tanhril hi ni khat ah darker 23 hnathawk thei tur leh tui litre Maktaduai 37 pump thei tur a ruahman niin Laipuitlang a Main Reservior, KM 15 a hla ah tui hi a pump chho dawn a ni. UD&PA leh PHE Minister-te hi Er. Lalrinkima Hnamte, Secretary, PHED, Er. Zodinthari, Chief Engineer Zone – I, Pi Zarzokimi, Joint Secretary, UD&PA leh PHE Department-a thawktuten an tawiawm a ni.