849/2022-2023
Lunglei the 10th June, 2022 : Mizoram hmun dangte rualin vawiin khan Lunglei-ah pawh “Thing phun la, tuihna siam rawh” tih thupui hmangin District Level Green Mizoram Committee buatsaihin ‘Green Mizoram Day 2022’ hman a ni a, he Ni puala inkhawm Mizoram Polytechnic Campus, Hrangchalkawna neihah Lunglei HPC Vice Chairman Pu Lawmawma Tochhawng chu khuallian a ni.

He hunah hian Lunglei District chhunga sawrkar department-te, NGO, khawtlang hruaitute leh media mite an tel a. Kumin Green Mizoram Day ah hian planting agency 43 ten thing tiak 376 Mizoram Polytechnic Campus ah an phun a ni.

Green Mizoram Day 2022 hawnna inkhawm Lunglei DC & Chairman District Green Mizoram Committee Pu Kulothungan A kaihhruaiah Pu Lawmawma Tochhawng chuan Green Mizoram Day 2022 puala Mizoram pum huap thing phun hnatlangpui leh program dang buatsaih ten rah tha tak a neih ngei a rin thu sawiin heng thing phunte nung ngei tur leh ti puitling ngei turin planting agency kalkhawmte chu uluk taka enkawl zui turin a chah a. Ramngaw leh nungchate humhalhna kawngah mitin ten mawhphurna pawimawh tak kan nei theuh a ni tiin Lunglei HPC Vice Chairman chuan ramngaw leh nungcha humhalh pawimawh zia a hre tu mai nilo a, nunpuitu nih theuh tum turin kalkhawmte a sawm a ni

A sawi zelnaah Lunglei HPC Vice Chairman chuan Lunglei District mipuite faina lamah leh ramngaw leh nungcha humhalh kawngah kan thangharh chho zel hi a lawmawm takzet a, hemi kawnga theihtawp chhuahtu EFCC Department, YMA, MUP, MHIP, Project Save Tlawng leh Clean Lunglei te thawhrimna a fakawm takzet a ni tiin an hmalak zelna turah duhsakna a hlan bawk a ni.

Pu PC Lalchhandama, DFO, Member Secretary, District Level Committee on Green Mizoram chuan report pe in Pu Lalrotluanga, President Sub Hqrs YMA chuan lawmthu sawina hun a hmang.

Vawiin Green Mizoram Day 2022 puala inkhawmah hian Lunglei District huamchhunga kangmei laka invenna (Fire Prevention) lama khaw ti thate hnenah HPC Vice Chairman chuan lawmman a hlan nghal a. Chungte chu :

1st Bualte - Rs.50,000/- + Citation ;
2nd Chawilung S- Rs.30,000/- + Citation ;
3rd Thenhlum- Rs.20,000/- + Citation

Green Mizoram Day 2022 pual hian thingphun tu agency (Planting Agency) te chu category hnih – Sawrkar Department leh NGO & others hnuaiah then niin a ti tha pathum thlanchhuah te lawmman hlan an ni bawk:

PLANTING AGENCY TI THA - SAWRKAR DEPARTMENT
1st – P&E Department
2nd – Excise & Narcotics Department
3rd - PHE Department

PLANTING AGENCY TI THA – NGO & OTHERS

1st – District PYD NE India
2nd – NSS Unit Govt J Buana College
3rd - NSS Baptist Higher Secondary School & NSS Unit, Lunglei Govt College

Green Mizoram 2022 pual hian Essay writing on Forest Fire Prevention neih niin lawmman dawngtute chu:

1st – H. Lalrinmawiia, Sacred Heart Secondary School, Lunglei
2nd – John Bright Vanliana, Govt High School Thingsai
3rd – J Remsangzuali, Govt High School, Thingsai

Green Mizoram Day hi a tirah chuan "Green Aizawl" tiin kum 1998 khan Aizawlah hman tan a ni a. Kum 1999 atangin "Green Mizoram" tih hming chawiin ram pumah hman a ni. Green Mizoram Day hi Lunglei District-ah kum 1999 atang khan hman tan niin he ni pual hian thing tiak a vaiin 12,650 phun tawh niin zaa sawmnga (50%) nung a chhut a ni a. Lunglei District-ah kum 1999 atanging Planting agency te hnehah thing tiak 560587 pek chhuah a ni tawh bawk.