848/2022-2023
Dated Serchhip, the 10th June, 2022: Vawiin khan Green Mizoram Day, 2022 Serchhip district hawnna hun Thenzawl Golf Course & Resorts Convention Centre ah buatsaih a ni a. Golf Course chhehvelah thingphun hnatlang neih zui nghal a ni.

A hawnna inkhawma khuallian, Pi Nazuk Kumar, IAS, Serchhip bawrhsap chuan kangmei ven kawnga thawk tha lawmman dawngtute zawng zawng a lawmpui thu a sawi a. Green Mizoram Day ah thingphun te, tuihna humhalh te, ramngaw humhalh thute sawiin kan inzirtira, thing kan phun bawk a. Nimahsela he ni thiltum hi thil thuk zawk leh ril zawk awmin ka hria, chu chu khuarel leilung (nature) nena inrem taka nun hona (live in harmony with nature) hi a ni. Tui leh boruak thianghlim pawimawhzia hi inhrilh nawn fo a ngai lova kan nunna hnar pahnih pawimawh em em tui leh boruak thianghlim kan neih theihna hnar chu thing leh maute hi an ni si a. Chuvang chuan kan thing leh mau, kan ramngawte humhalh hi ngaihthah theih a ni lova, phur taka bawhzui zel tur thil a ni, tiin Green Mizoram hlawk taka hman a pawimawhzia a sawi a. Serchhip district ah hmalakna tha tak tak a lo awm tawh thin leh vawiin thlenga mipuiten phur taka kan la kalpui zel chu lawmawm a tih thu a tarlang bawk. Hun kal tawha kan thing lo phun tawhte an damkhawchhuah theih nana bei zel tur leh kan fate hnena thingphun pawimawhna zirtir uar deuh deuh turin a chah bawk a ni.

Khuallian hian tun kum kal meka kangmei venna kawnga titha khuate hnenah lawmman hlanna a nei nghal a. Lawmman dawngtute chu; pakhatna Lungpho hnenah Citation leh Rs. 50000 pahnihna Zote South hnenah Citation leh Rs. 30000, leh pathumna Bungtlang hnenah Citation leh Rs 20000 te hlan an ni a, heng lawmman dawngtute hi State Level atangin lawmman hi siamsak a ni a, anni bakah hian district level committee chuan hnathawk tha khua pathum dangte hnenah hriatpuina thilpek an hlan bawka, chung khuate chu; Leng, Piler leh Chhingchhip Mualpui an ni a, Citation leh Rs. 5000 theuh pek an ni. Chanchinbu kangmei ven kawnga titha pakhat Lenkawl Daily Newspaper hnenah Citation leh Rs. 5000 pek a ni bawk.

Inkhawm hi Pu Lalbiakchama Chawngthu, DFO, Thenzawl; Member Secretary, Serchhip district Green Mizoram Committee chuan kaihhruaiin Green Mizoram Serchhip district hmalakna tlangpui report a pe a, Covid hripui vangin kum hnih chhung chu kum danga kan hman thin angin kan hmang thei lova, nimahsela kuminah tha takin kan hmang leh thei ta hi a lawmawm hle a ni. Kumin hi Green Mizoram Day vawi 24 na a ni a, nikum bikah khan Serchhip district Green Mizoram Day ah thing 1400 vel phun niin 7000 vel zet mipuite hnenah semchhuah a ni.

Dr. Lalhmangaihzuali, Asst. Proffessor, Department of Botany, Govt. Serchhip College chuan "Tuihna insiam chhoh nana ramngaw pawimawhna" tih thupui hmangin kalkhawmte zirtirna a pe a. Pu K. Saitluanga, DIPRO kaihhruaiin kalkhawmte hian nungcha leh ramngawte humhalh tura intiamna thu an sawirual a, Pu RL Chhuanawma, Honorary Wildlife Warden in lawmthu sawiin a hawnna inkhawm a khar a ni.

Convention Centre-a a hawnna inkhawm neih zawh hian Golf Course ram leilung luangral tur venna leh a sira luang Vanva lui tuihna humhalh zel nan hmun thlan bik engemawzatah thing phun hona neih zui nghal a ni a. Naktuk hian sawrkar department leh pawl hrang hrang Green Mizoram Day kal taa thing lo phun thin tawhte chu an thingphunte samfai hnatlang nei tura beisei an ni.