847/2022-2023

Nikir thla ni 10, 2022: Mizorama kum tina June ni 11-a hman ṭhin Green Mizoram Day chu kumin hian June ni 10-a hman tura tih a nih angin vawiin khan Lawngtlaiah pawh hman a ni a. He ni pual hian Lawngtlaia sawrkar department hrang hrang, zirna in, District MJA leh CYLA te chuan Kaladan Multi Modal Transit Transport Project (KMMTTP) kawngpui sir, Lawngtlai aṭanga kilometre 9 vela hlaah inzar pharhin thing ṭiak 350 an phun a ni.

Chawhma dar 10-ah Lawngtlai Bawrhsap pisa tualah a hawnna inkhawm buatsaih niin, Lai Autonomous District Council (LADC)-a Chief Executive Member charge la mektu Pu Lallawmsanga Apetow (EM i/c RD, PWD & AH&Vety) chu khuallian a ni.

Khuallian chuan Green Mizoram Day-in a tum ber chu Mizorama thing leh mau chereu lam pan mek siam ṭhat lehna hna thawh a nih angin Lawngtlai District-ah pawh tun hma aia ramngaw humhalh leh thing phun kawnga uar lehzuala hma lak a ṭul a ni, a ti a. Ramngaw humhalh chu mi tin mamawh tui hna kang chat tur leh tlem zel tur venna, boruak ṭha humhalhna a nih avangin mi tin mawhphurhna a ni, a ti.

Kumin Green Mizoram Day thupuiah hian "Thing phun la, tui hna siam rawh" tih chu hman a ni a. Lawngtlaia a hawnna inkhawm hi Lawngtlai Additional Deputy Commissioner Pu James Miahlung chuan kaihruaiin, LADC-a District Council Conservator of Forests (DCCF), District Level Committee on Green Mizoram-a Member Secretary ni bawk Pu K. Lalromawia chuan Lawngtlaia Green Mizoram Day hman tawh dan leh hriat tur pawimawh a sawi a. Kangmei ven kawnga thawk ṭha khua chawimawina 'Village Level Fire Prevention Award 2022' dawngtu khuate hnenah Khuallian chuan lawmman a hlan bawk.

Village Level Fire Prevention Award 2022 lawmman pakhatna hi Archhuang khuain an dawng a; pahnihna chu Siachangkawn niin, Vawmbuk Vaivakawn chu pathumna an ni a. Lawmmanah thuziak leh pawisa fai hlan ṭheuh an ni.

Hawnna hun hman zawh hian thing phunna tur, KMMTTP kawngpui lam pan nghal a ni a. Nodal department, LADC-a Environment, Forests & Climate Change Department lamin department hrang hrangte thing phunna tur hmun an ruahman saah thing phun tur leh a hungna tur an lo chhawp lawk angin department hrang hrangte chuan thing hi phunin, he'ng an thing phunte hi ṭha taka hungin, an chhinchhiah fel vek bawk a ni.

Green Mizoram Day hi a tirah chuan "Green Aizawl" tiin kum 1998 khan Aizawlah hman ṭan a ni a. Kum 1999 aṭangin "Green Mizoram" tih hming chawiin ram pumah hman a ni. Lawngtlai District bikah chuan kum 2000 aṭang khan hman ṭan niin, kum tin hman a ni a. Kum hmasa lam eng emaw ti chhung kha Green Mizoram Day hian Lawngtlai leh Mampui inkar kawngpui dungah thing phun ṭhin a ni a. EF&CC Department chhinchhiah danin Mampui kawnga thing phun zingah hian 1,485 chu a nung a, za zelah sawmkua (90%) nung ang a ni.