846/2022-2023
Aizawl the 10th June, 2022 : Sawrkar laipui Union Cabinet thukhawmin kum 2020-a a lo pawm tawh New Education Policy chu a taka kalpui turin Mizoram a inbuatsaih mek a. Vawiin khan NEP chungchang zirho turin Mizoram District tin atanga Higher Education zirtirtute an kalkhawm a, Aijal Club-ah nilengin symposium an nei. Symposium hawnna inkhawmah hian Higher and Technical Education Minister Dr R.Lalthangliana chu khuallian a ni.

Dr R.Lalthangliana chuan New Education Policy inkaihhruaina chhungah engtinnge danglam takin Mizoramin kan kalpui theih ang tih ngaihtuah turin a chah a. Hmasawnna ruhrel din leh kan neihsa chei that piahlamah Mizoram zirna siam tha tura kan state bilin kan mamawh, ram dang te tan pawha entawntlak tura kan invawrh theihna tur dap a, ngaihtuahna thuk zawk seng turin mithiam kalkhawmte a fuih a ni. College leh institution hrang hrangten pass percentage sang tak neih a, result tha neih hi a ropui viau laiin thiamna tak tak pawchhuak a, zirlaiten chhawrtlak thiamna an neih a pawimawh H&TE Minister chuan a ti a. Hna tlanglawn diltu tam tak an awm thin laiin Zoramin a mamawh ni si, thiamna bik neih tul hna thenkhatah dil thei tur kan inhmu zo lo thin hi a pawi hle, tih sawiin thiamna daihzai leh kil tin dengchhuak thei kan mamawh a ni, a ti.

Zirna kawngah Mizoram kan chhe bik lo, Dr R.Lalthangliana chuan a ti a. Hmasawnna ruhrel din kawngah state lian zawk, upa leh hausa zawk te umphak harsa rih mahse zirna kawngah chuan a tha ber ni thei dinhmunah kan ding, a ti. Theih loh tur anga ngaih hi tih tak zetin, beidawng lova kan tan tlan chuan a theih vek, tiin Minister chuan zirtirtu kalkhawm te a fuih a. Taima leh thahnemngai taka symposium nei tura chahin mi thiam kalkhawmte ngaihtuahna thawkhawm hian Mizoram tana tangkai an chhawpchhuah ngei a beisei tih a sawi.

Principal Secretary Pi Esther Lal Ruatkimi chuan symposium koh chhan sawifiahin NEP a duhkhawp loh lai emaw belh tur emaw sawiho tur ni lovin, he Policy sawrkar laipuiin a pawm tawh hi engtiang ang taka thain nge Mizoramah kan kalpui theih ang tih ngaihtuah tura kalkhawm kan ni, a ti a. NEP hi dan (act/rule) a ni lo a, policy a nih angin education-a kan kalphung tur kawng duang tu a ni, a ti. NEP hnuaiah hian India ram hi Zone hrang hrangah then a ni a, Mizoram chu Zone 2 chhungah region 3 ah Nagaland, Sikkim leh Tripura nen kan awm ho tih Principal Secretary chuan a sawi a. National concept paper awmsaah chuan theme anga kalpui niin access, quality leh future readiness tia then darh a ni a, Mizorama kan kalpui dan turah leh vawiin symposium neihah pawh chuti hawi zawnga an rilru dah turin kalkhawmte a chah a ni.

Mizoramah hian tun dinhmunah Undergraduate zirna college 21 leh Constituent College pakhat a awm a. Higher institution hrim hrim hi 41 awmin heng zingah hian University 3 - MZU, ICFAI leh NIT an tel a. Mizoram state government enkawl lai 26 a awm a ni.

Higher and Technical Education Department buatsaih Symposium on NEP 2020 Implementation neihah hian Prof. Benjamin Lalrinsanga, OSD, NEP 2020 Implementation leh Prof.K.Lalchhandama, HOD, Dept of Life Science, Pachhunga University College te chu resource person an ni a. Inaugural Programme hi H&TE Director Pi Sangchin Chinzah in a kaihruai a ni.