543/2024-2025

LUNGLEI; the 22nd May, 2024: Vawiin chawhma dar 10:30 khan DC conference Hall-ah kumin Green Mizoram Day hman dan tur relin District Level Committee on Green Mizoram (DLCGM) member te an thu khawm. Meeting hi Pi Ramdinliani, DLCGM chairman leh bawrhsap ni bawk chuan kaihruaiin, Pu Lalduhthlana DFO chuan meeting agenda te pharhin, Green Mizoram Day puala Lunglei Forest Division hmalak tawhna leh hmachhawp te power point presentation hmangin a entir bawk. Kumin Green Mizoram Day-2024 thupui a tan “I nunna atan thing phun rawh( Plant Trees for Life)” tih thlan a ni.

Vawiin DLCGM meeting chuan Green Mizoram Day-2024 pual programme hi TNT Complex, Theiriat-ah tahrik ni 11 June,2024, chawhma dar 11:00 khian hman ni se, khuallian atan Hon’ble Minister Pi Lalrinpuii sawm ni se, tiin a rel a. GMD pual programme hman zawh hnuah Sawrkar Department, Tlawmngai pawl leh Project Save Tlawng te tang hova “Hrangchalkawn –Tawipui” kawng sira thingtiak phun( Road Site planting) hnatlang neih zui nghal tur leh thingtiak leh a hungna tur te, a phunna tur hmun lo thlan lawk te chu Lunglei Forest Division lo ngaihtuah turin a rel bawk.

Pu Lalduhthlana, DFO chuan Green Mizoram Day hman tan kum atanga nikum (1999-2023) chhung khan Lunglei Forest Division chuan thingtiak(sapling) 5,74,920 a lo sem chhuah tawh thu leh Green Mizoram Day pualin thingtiak 13,521 t phun a nih tawh thu meeting-ah report pein,nikum khan GMD pualin Tlawng Road (Lunglei- Mausen inkar)-ah thingtiak 395 phun niin, 96%(380) an dam khawchhuah thu a report bawk.

GMD-2024 hawnna programme-ah hian nikum chhunga kangmei laka an khaw huam chhunga Ramngaw humhalh tha thingtlang khaw 3 hnenah Village Level Fire Prevention Award lawmman sem nghal a ni ang.