542/2024-2025

Champhai, the 22nd May, 2024: Vawiin chawhma dar 11:00 khan Champhai District Bawrhsap Pu James Lalrinchhana hovin Experiential Learning Centre (ELC), Champhai enkawl tura din, Management Committee of Experiential Learning Centre chu DC Conference Hall-ah an thukhawm.

He hun kaihruaitu District Bawrhsap Pu James Lalrinchhana chuan Experiential Learning Centre chu Sawrkar laipui Ministry of Information & Broadcasting kaltlangin State thlan bikah din a nih thu sawiin, Champhai District chu Mizoram District zinga Experiential Learning Centre hmalakna awm chhun a nih thu a sawi a. Khawvel thiamna sang zelah Artificial Intelligence-in kan nunah hmun a chan nasat thu sawiin, games mai bakah zirlai puitu turte dah a nih dawn avangin ELC chu zirna hmun pawimawh taka siam tum a ni, a ti bawk.

He hunah hian Dr. Manesia Khaimeichho, Member Secretary, SDO (Sadar) in meeting agenda sawifiahin Pi K. Zonunsiami, UDC, DC  Office-in hmalak tawh dante a sawifiah a. Master Trainer Pu K. Lalngaihzuala, District Informatics Officer, NIC in khawl hrang hrangte leh a hman dante a sawifiah bawk.

He hunah hian chak zawka hnathawh a nih theih dan tur sawiho niin, hnathawh hmabak la awmte chu a rang thei ang bera zo fel tura hmalak nise tih a ni a. A enkawl chhunzawm zel nan ELC hawn fel a nih hnua entry fee leh khawl hman man tur rate chungchang sawiho niin, hemi chungchang bik hi zirchianna neihhmasak nise tih a ni a. Zirna kaihhnawiha pantute tan erawh engemawchen ngaihhnathiamna siam sak nise tih a ni a. A hmun a thawk nghet tur Receptionist pakhat leh a chhunga khawl enkawltu tur Operator pahnih lak nise tih a ni a. ELC hi kumin June thla chhung ngeia hawna ataka kalpui hman tura tanlak nise tih a ni bawk.

Experiential Learning Centre (ELC) hi CHANEM building 2nd floor-ah bun mek niin, a hmunhma cheibawl hna hi April ni 29, 2024 ah tan a ni a. Tunah hian chhuat phah leh a bang siam mai bakah corridor cheimawi, receptor counter, rack leh gate siamte a la ngai a. Virtual Reality Gaming bik atan BellAtoZ atanga lokalte'n May ni 18, 2024 khan gaming material-te endikin May ni 20, 2024 khan Master Trainer turte training an pe a ni.

ELC bungraw hrang hrang EGG VR (a ruala mi 2 chuan theihna), Bike Racing, Car Racing, 360VR, Gaming Arena, Walk the plank leh HoloWorld-te chuan March ni 29, 2024 khan Champhai a thleng a; tunah hian hmunhma buatsaih leh khawl bunfel hna hi thawh mek zel a ni.

Meeting zawhfel hnu hian Management Committee on Experiential Learning Centre chuan an Chairman Pu James Lalrinchhana hovin CHANEM Building tlawhin ELC bun meka hmalaknate an enfiah nghal a ni.