541/2024-2025

Kolasib dated 22nd May, 2024: Vawiin khan DC Conference Hall, Kolasibah vawk natna, African Swine Fever lak a invenna kalpui dan tur leh he hri vang a vawk thi an awm a hmalak dan tur relin District Level Coordination Committee on Africa Swine Fever chuan thutkhawmna an nei a. Pu John LT Sanga, Deputy Commissioner chuan hun kaihruaiin Dr. Lalsanglien Ralsun, District Veterinary & Animal Husbandry Officer chuan Kolasib district-a ASF dinhmun sawi zauna hun a hmang.

Deputy Commissioner Pu John LT Sanga chuan vawk chu mizoten a kan sa ngainat leh kan vulh nasat tak a nih avangin African Swine Fever leh PRRS hri avangtein kum engemaw chen chu ran vulhtuten harsatna an tawh thin thu a sawi a. Mizoram district thenkhat ah ASF hri a leng tih finfiah tawh a nih laiin kumin ah Kolasib district-ah he hri avang hian vawk thi la awm lo mahse he hri lak a kan him zel theih nan ruahmanna tha tak duan a pawimawh thu a sawi.

Dr. Lalsanglien Ralsun, District Veterinary & Animal Husbandry Officer chuan Africa Swine Fever vangin December 2021 thleng khan Kolasib district chhungah vawk thi 168 chhinchhiah a nih thu tarlangin ASF thawh hnihna, November ni 31, 2022 thleng khan vawk 2575 thi a awm thu a sawi a. ASF hri lenna hmun a puan, Infected Area-a vawk la dam te suat (Cull) an nihin zangnadawmna dil sak an nih thin thu Dr. Lalsanglien Ralsun chuan sawiin hemi anih avangin hian thuneitute hriatpuina nen fimkhur leh uluk tak a kalpui a tul thu a sawi.

Vawiin thutkhawmna ah hian kumin chhungin ASF hri vangin Kolasib district chhung ah vawk thi an la hmuh loh thu District Veterinary & Animal Husbandry Office-a thawktute chuan an sawi a, amaherawh chu Mizoram chhung khaw hrang hrangah he hri hi a darh mek avangin fimkhur tak a hmalak ran a tul thu an sawi. Thutkhawmna ah hian ASF hri lenna khua, Infected Area atanga vawk leh vawk sa atanga siamchhuah lak luh khap a tul thu te, ramri a Check gate-ah vawk leh vawksa atanga thil siam lak luh a nih loh nan endikna kalpui dan tur te, vawk dam lo a awm chang a rang tak a thuneitute hriattir an nih theih dan tur leh ran thi sawngbawl dan tur te rel a ni a. Hri vang a thi vawk a awmin, uluk tak a phum a nih theih nan a hmunhma felfai tak ruahman a tul thu sawi a ni. Mipuiin sa hrisel chauh an lei theih nan District Veterinary Office-a mithiamte endik hnu ah vawk hrisel ni a finfiah leh phalna pekte chauh talh thin a nih theih nana hmalak dan turte sawi ho a ni.

Thutkhawmna ah hian District Veterinary & Animal Husbandry, Kolasib a Veterinary Officer-te, Sr. CMO, SDO (Sadar), Addl. SP leh SDPO, DIPRO, BDO, Thingdawl, Jt. VC leh Sub-Headquarters YMA Kolasib aiawhte an tel a ni.