966/2026-2027

Lunglei, 2026 Nikir thla ni 11: Vawiin khan Lunglei District Level Committee on Greeen Mizoram buatsaihin Lunglei District-ah "Thing hi rangkachak anga hlu, nunna tinreng bul a ni" tih thupui hmangin Green Mizoram Day hman a ni a. Ṭhaizawl Community Hall-ah Sub-Divisional Officer (Sadar) Pi TT Beikhaizi hovin a hawnna hun hman a ni.

Lungleia Green Mizoram Day 2026 hawngtu SDO (Sadar) Pi TT Beikhaizi chuan mihringte nunna bul boruak thianghlim (oxygen) siamtu thing leh maute humhalh leh phun belh zel a ṭul thu sawiin, ramngaw kan tihchereu hian mihring tan mai bakah nungcha dangte tan pawh a pawi em em a, chu vangin ramngaw humhalh leh thing phun kawngah nasa zawka ṭan lak a ṭul, a ti a. Green Mizoram Day puala sawrkar department leh tlawmngai pawlte'n thing an phun ṭhin chu thil ṭha tak a nih laiin, a puitlin theihna tura enkawl zui kawngah ṭan lak a pawimawh thu a sawi a. Sik leh sa nuam, boruak thianghlim nei turin mi tinin mawhphurhna kan nei tiin, thing phun thar leh phun sa enkawl zui kawngah ṭan la thar ṭheuh turin kal khawmte a chah.

Lunglei District Animal Husbandry & Veterinary Officer Dr Lalmuanpuia Samte chuan hun kaihruaiin, Evan. C. Lalsawma, Ṭhaizawl chuan hunserh a hmang a. DLCGM Member Secretary, Lunglei Divisional Forest Officer Pu Lalduhthlana chuan report pein, District Level Committee-in Green Mizoram Day-a thing phunte enfiah vek ni se a tih anga enfiah a nih thu leh kum 2024-a Lawngtlai lam kawnga pawl 54 te'n thing ṭiak 1,176 an phun zingah a nung ṭha 678 leh a thi 498 a awm thu a sawi a. Tun ṭumah hian chu'ng thing phun thi 498 chu a thara thlakleh a hungna chhiate siam ṭhat tur a nih thu a sawi.

He hunah hian kumin ṭhal laia kangmei veng ṭha khua/veng lawmman, Village Level Fire Prevention Award 2026 sem niin, SDO (Sadar) Pi TT Beikhaizi chuan lawmman pawisa fai leh certificate a hlan a. Pakhatna Mausen (₹70,000), pahnihna Zotuitlang (₹50,000) leh pathumna Lungrang South (₹30,000) te niin, khaw pathum – Ṭhaizawl, Mualṭhuam North leh Hmuntlang te hnenah consolation prize ₹10,000 ṭheuh hlan a ni bawk.

He hunah hian Ṭhaizawl Village Council President Pi C. Lalngaihsaki pawhin thu sawiin, MHIP Sub-Headquarters Lunglei President Pi Lalliannguri'n lawm thu sawiin hun a khar.

Hawnna hun hman zawh hian SDO (Sadar) Pi TT Beikhaizi, DLCGM member-te leh office hrang hrang hotute chuan hmun ruahman saah thing ṭiak an phun a. Hemi hnu hian Lunglei leh Ṭhaizawl inkar National Highway kawngpui dunga department leh pawl hrang hrangte'n kum 2024-a an thing phun tawh sate tifaiin, a thi thlakna thing ṭiak thar an phun belh bakah a hungna an siam ṭha nghal bawk.

Green Mizoram Day hi a tirah chuan "Green Aizawl" tiin kum 1998 khan Aizawlah hman ṭan niin, kum 1999 aṭangin "Green Mizoram" tih hming chawiin ram pumah thing phun ni atan hman a ni a. Nikum khan Lunglei tui lakna, Pialthleng leh Tlawng hnarah Lungleia department leh pawl hrang hrang 55 te'n thing ṭiak 1,203 an phun a, EF&CC Department chhinchhiah danin 859 (71.40%) a la nung a. EF&CC Department chuan kum 2025 chhung khan Lunglei District-ah mimal, VC leh pawl hrang hrang hnenah thing ṭiak phun tur 40,777 an sem chhuak.