965/2026-2027

Lawngtlai, the 11th June, 2026 : Vawiin chawhma dar 10:30 AM khan "Thing hi rangkachak anga hlu, Nunna tinreng bul a ni" tih thupui hmangin Lawngtlaiah 'Green Mizoram Day 2026' chu Deputy Commissioner Office tualzawlah inkhawm tawi leh Lawngtlai leh Kawlchaw inkarah te thingphuna hun hman a ni.

Bawrhsap tualzawla inkhawmna tawi hi Pu Donny Lalruatsanga chuan kaihruaiin Chief Executive Member, LADC Pu C.Lalsawmzuala chuan Khuallian niin a hmanpui a. Thusawiin Pu C. Lalsawmzuala chuan , Pi leh Pute khan ramruak ringawt min hnutchhiah lova, Ramngaw tha tak, nungcha chitin min hnutchhiah a, a enkawltuten kan duatloh vangin a chereu nasa a, siamtha tur chuan uar zawka Thing phun a, a puitlin thlenga enkawl a tul a ni, a ti. Pi leh Puten Mizoram an lo enkawl tawh dan ngaihtuah chungin, Thangtharte hian ram ngawt humhalh kawngah tan lak thar a tul hle tih a tarlang a. Mizoram rawn luahzel turte tana ram nuam leh chhenfakawm zawk hnutchhiah hi mitin mawhphurhna a ni tiin, Thingphun i uar deuh deuh turin Lawngtlai mipuite a sawm a ni.

Green Mizoram Day, 2026 ah hian CEM, LADC chuan Lawngtlai Deputy Commissioner chu kawng hrang hranga District hmasawnna atan theihtawp a chhuah vangin 'Certificate of Appreciation' a hlan a. District Level Fire Prevention Committee- in kangmei vengtha Veng/khua a thlan te; Pakhat na - Rulkual, Pahnih na - Siachangkawn, Pathum na- Diltlang South bakah Consolation Prize- Thaltlang, Lawngtlai Vengpui leh Chawnhu hnen ah lawmman hlan niin, Chanchinbua Kangmei ven chungchang ziak thate leh Kangmei ven inzirtirna lam haawia Reels - insiamsiaka lawmman late hnenah hlan an ni bawk.

Bawrhsap tualzawla hun hman zawh hnu hian Sihtlangpui leh Kawlchaw inkarah Department hrang hrang ten Thing tiak 420 phunin, tha takin an hung a. Green Mizoram Day - a khuallian CEM, LADC, Deputy Commissioner, Lawngtlai leh mipawimawh dangten a bika an phunna tur ruahmanah Thing hi an phun bawk a ni.

Green Mizoram Day - pual Thingphun te hi kum 2019 atang khan mumal taka chhinchhiah tan niin, kumin thleng hian Thing tiak - 2079 phun tawh a ni.