755/2024-2025

Lunglei, the 11^th June, 2024: Mizoram hmun dangte ang bawkin vawiin khan Lungleiah pawh ‘I nunna atan thing phun rawh’  tih thupui hmangin Green Mizoram Day pualin hun hman a ni a. Pi Lalrinpuii Health Minister chuan Green Mizoram Day puala hun buatsaih hi khuallian niin a hmanpui.

Lungleia Green Mizoram Day puala inkhawm  Lunglei Home (TNT complex, Theiriat) hmuna buatsaih hi  District bawrhsap leh  Chairman, District Level Committee on Green Mizoram (DLCGM) ni bawk  Pi Ramdinliani, IAS chuan kaihruaiin;  Green Mizoram Day chu Mizoram Sawrkar Programme pawimawh tak leh kan mamawh em em a ni tiin, kan ram kan tih chereu nasat avangin tuihna a tlem zela Lunglei phei chu tui harsatna hmun a ni, a ti.

Khuallian Pi Lalrinpuii chuan thu sawiin, ram changkang apiangin thingphun an uar a, Mizoramah chuan ram tichhia leh ngaw tichereu zawngin lo kan neih thin avangin kan ram ngaw a chhe nasa em em a. Vawiin Green Mizoram Day puala hun hmangtute zawng zawng hian thing pakhat lek kan phun pawh hian kan ram sik leh sa siamthat nan nasa takin a tangkai a ni tih i hre thar leh ang u, a ti.

TNT chungchang sawiin khuallian chuan nikum December thla-a TNT, Muanna veng, Zuangtui a tlawh thu leh kum 60 chin chunglam te awmna chep tak a hmu thu te sawiin,TNT enkawltu ten an mamawh a hnena an thlen angin, kum 60 chin chunglam te awmna tur In sak nan ₹ 250 lakhs pawh sanction thei tep a ni thu Minister chuan  a tarlang bawk. TNT inmate-te hnenah thuchah sawiin, khuallian chuan Kan ram hian hmasawnna nasa tak neiin, in leh lo ropui tak tak nei mah ila; ruihhlo in kan thalaite a tihchhiat si chuan awmzia a awm lo a ni. Hetiang anih avang hian Sawrkar chuan ruihhlo dona kawngah theihtawp a chhuah zel dawn a, Central YMA te nen pawh sawiho a nih tawh bakah Chief Minister ho pawhin hmalak dan tur sawiho a ni tawh a ni, a ti. TNT a awm ruihhlo ngaite pawh ramin a mamawh che u a ni  tiin,  Pathian hmingin an ruihhlo tih thinte bansan turin a sawm a ni. TNT hotupa Pu Dr. Sangthankima'n Padma Shree a dawn chu a lawmpui tak zet thu sawiin, Dr. Sangthankima hian a phu hle a ni, a ti bawk. Minister chuan Green Mizoram Day chu ram leh mitin tan malsawmna nise a duh thu sawiin, vawiina Green Mizoram Day puala thingtiak phun te chu an damchhuah vek theih nan planting agencies te duhsaknaa hlan bawk.

Green Mizoram Day pual programme-ah hian Sawrkar Department 40 leh pawl hrang hrang 10 ten Hrangchalkawn leh Tawipui ‘N’ inkar kawnpui sir-ah Thingtiak 1166  an phun a. Vawiina Green Mizoram Day  puala thingtiak phun te chu: Tlaizawng, Herhse, Chawnpui, Makpazangkang, Chawmzil, Khuangthli, Tufar, Lenhmui, Pangkai, Nghalchhun, Theihai, Sunhlu, Tum, April Par pawl, Litchi, Bul, Theitat, Tei, Reraw, Lamkhuang, Mualhawih, Nauvabuan te an ni.

Vawiin GMD puala hun hmannaah hian khuallian bakah Dr. Sangthankima TNT Founder pawhin thu sawiin TNT chu hmun hrang hrangah awmin Thing leh mau kan humhalh nasa hle a ni tiin; thingzar sahthlak mai mai kan phal ngailo a, environment humhalhna kawngah phak tawkin hma kan la thin a ti. Ani bakah hian Pu R. Lalrochama Adviser Project Save Tlawng leh DFO Lunglei Pu Lalduhthlana te pawhin thu sawi bawkin TNT Lunglei zaipawl leh Pi Lalenkawli Pautu te an zaia, Rev.J.C Vanlalluaia BCM in hunserh a hmang a ni.

Green Mizoram Day  lawmna programme-ah hian nikum lama Lunglei District chhunga kangmei vengtha khuate hnenah Khuallian Pi Lalrinpuii chuan lawmman a hlan a, lawmman dawngtute chu:

Pakhatna - Bualte, 1^st Prize hian Citation leh ₹ 50,000 a keng tel

Pahnihna –Sairep,  2^nd   Prize hian  Citation leh ₹ 30,000  a keng tel

Pathumna- Bualpui 'V' , 3^rd Prize hian  Citation leh ₹ 20,000  a keng tel

Consolation Prize ₹10,000 theuh khaw 3: Mausen, Phairuangkai leh Muallianpui te hnenah pek an ni bawk. Vawiina hun hmannaah hian Pu Lalramliana (Papuia) Lunglei South bialtu MLA bakah Lungleia Department hrang hranga Head of Office leh an staff te, LMC hotute leh NGO leh Kohhran hruaitute thahnem tak an tel a ni. Vawiin Green Mizoram Day hawnna chhimtu ten Lunglei Home (TNT,Theiriat) tan thawhlawm an thawhkhawm  ₹.70,000/- chuang chu  TNT Founder Dr. Sangthankima hnena hlan nghal a ni.

Lunglei Home (TNT complex, Theiriat) a Green Mizoram Day lawmna programme hman zawh hnu hian Khuallian Pi Lalrinpuii leh official dang 6 ten Ceremonial planting atan Herhse an phun bawk a ni.