754/2024-2025

Aizawl, 11th June, 2024 : Vawiin khan Mizoram pumpuiah Green Mizoram Day chu ‘I nunna atan thing phun rawh’ (Plant Trees for your Life) tih thupui hmangin hman a ni a, A hmanna pui ber chu Multipurpose Cultural Complex Auditorium, Berawtlang-ah hman a ni. He hunah hian AH & Vety minister Pu C. Lalsawivunga chu khuallian atan hman a ni a, Assembly Speaker Pu Lalbiakzama pawhin he hun hi hman puiin, he ni denchhen hian Zokhawsang, Assam Rifles Complex-ah thing phunna hun 'Ceremonial Planting' an hmang bawk a ni.

He hunah hian khuallian Pu C. Lalsawivunga chuan thu sawiin, Green Mizoram Day chu Green Aizawl Day a bultan niin, Mizoram pum huap hmalakna a nih theih nana 1999 atangin Green Mizoram Day tia thlak a hman thin tak a nih thu a sawi a, kum 2014 ah khan Mizoram sawrkarin June ni 11 hi “Green Mizoram Day” ah a puang tih a sawi a. Green Mizoram Day puala thing tiak phun runpui buatsaih a ni thin chu lawmawm a tih thu sawiin khuallian chuan awmze nei lehzual zawka thing phun a tul a tih thu a sawi a, a hmun a zira tuihna siam thei chi leh rah tlan chi thing phun tura ruahman a that thu sawiin Green Mizoram Day hmang tura sawrkar department hrang hrang leh tlawmngai pawl hrang hrang te, ramngaw leh nungcha humhalhtu pawl hrang hrangte thawhhona chu chhuanawm a tih thu a sawi bawk.

Khuallian chuan EF&CC department thil tum lian ber ber te chu ramngaw humhalh bakah ramngaw tihpun te, nungcha humhalh te hi a ni a, hemi atan hian theihtawp chhuahin hma lak reng a ni a, mipuite pawhin hetih kawnga department hmalakna kan tawiawm a pawimawh takzet a ni a ti.

Assembly Speaker Pu Lalbiakzama pawhin thu sawiin mihringte kan damkhawchhuahna tur hian ramngaw tha leh nungcha te nen kan inmamawh tawn reng avangin dimdawi leh zah thiam taka kan humhalh an ngai a ni a ti a.Mizoramah ramngaw kan ngah kan tih rualin ramngaw tha leh bit chu kan nei tlem tawh hle tih sawiin ramngaw kan neih sa humhalh bakah ramngaw tha siam turin nasa lehzuala tan kan lak a hun takzet a ni a ti bawk. Pu Biakzama chuan tunhnaia Speaker bangla kawta thing kih a nih chungchang sawifiahin, Speaker bangla leh a compound chu PWD enkawl leh an kuta awm a nih angin PWD hotuten bangla kawta thingkung ding chu a awmna hmun a hmawr bakah lungrem bulah a awm a, tunhnaia thlipui leh ruah sur nasat lai khan a dinna zawn phei vel a khi nasa a, a bul vela chengte tan a him loh avangin leh a dinhmun a derthawn avangin kih an rawt tih a sawi a, a tul anga pawisa deposit ngai te deposit in dan ang thlapin an kalpui hnuah thing chu kih a nih thu a sawi a ni.

He Green Mizoram Day hmannaah hian lawman chi thum semchhuah a ni bawk a, khual lian chuan Kangmei ven kawnga ti tha zual, district pathum hnenah lawmman a sem a, chungte chu-

1-na - Kolasib District
2-na - Lawngtlai District
3-na - Mamit District te an ni.

Aizawl District chhunga kangmei veng tha khuate lawmman sem a ni bawk a, Pi Arti Chaudhary, Chief Conservator of Forests (RTM) chuan heng a hnuaia tarlan khaw aiawhte hnenah hian a hlan a ni -

1-na - Lamchhip
2-na - Kepran
3-na - Seling te an ni.

Kumina Green Mizoram Day hmanna ti hlutu pakhat chu mimal, thing phun hna thawk tha hnena lawmman mi 3 hnena pek hi a ni a, anni hian thing phun leh nursery siam kawngah te hma nasa takin an la a ni. Pu A.K. Biswal, PCCF & Member Secretary, State Level Committee on Green Mizoram chuan lawmman hi a hlan a ni –

1. PC Malsawma, Dinthar Veng, West Phaileng
2. PC Lalrinzuala, Maite
3. H. Zakunga, Sihphir Venghlun te an ni.

Pu M.Z. Singson CF(CC) chuan report pe in Green Mizoram Day tobul leh hman chhoh anih dante, hemi hnuaia hmalakna leh hmasawnna awm te a sawi a. Green Mizoram Day hman tan 1999 atanga 2023 thleng khan thing tiak 45,63,326 phun a ni tawh a. Kum 2013 atang hian thingphun te a nung zui em tih chhinchhiah tan a ni.

Vawiina Green Mizoram Day puala inkhawm hi Pu A.K. Biswal, PCCF & Member Secretary, State Level Committee on Green Mizoram chuan kaihhruaiin inlawmna thu a sawi a, Pu H. Lalengmawia, Commissioner & Secretary, EF&CC Department in sawihawnna hun hmangin, Pu Lalnunsanga Khawlhring, IFS, DFO, Aizawl chuan ceremonial planting neih dan tura ruahmanna a sawifiah bawk. Pi Magaret Lalramchhani, IFS DCF(WL) chuan lawm thu sawiin meeting hi tin a ni. Green Mizoram Day puala inkhawm neih zawh hian Zokhawsanga Assam Rifles hmunah thingphun "ceremonial planting" neih a ni a.

Green Mizoram Day hi 1999 atanga hman tan a ni a, kum 2014 atang khan kum tin June ni 11-a hman turin sorkarin thu a chhuah a, covid hripui len vanga kum 2 mumala hman theih loh bak chu kum tin hlung taka hman a ni thin.

Vawiinah vek hian Mizoram chhunga District tinah DC leh a changtu DFO te huaihawtin Green Mizoram Day hi thing phunna runpui atan hman vek a ni bawk.