Vawiin chawhma khan Lunglei Convention Centre-ah Taxation Department, Government of Mizoram leh Central Excise and Service, Shillong tangkawp chuan Goods and Services Tax (GST) chungchanga inhrilhriatna Awareness Campaign an buatsaih.

Pu Lalhmingmawia Ralte, IRS, Deputy Commissioner, Central Excise and Service Tax, Shillong Division chuan chhiah lak dan thar GST chu July Ni 1, 2017 atanga India ram pumpuia hman tan a nih tur thu a sawi a. Kum khata cheng nuai 10 leh a chunglam bungrua emaw tha (service) lei chhuak te leh Mizoram pawn atanga hralh tura bungrua la luttute chu GST hnuaia an in register a, Permanent Account Number (PAN) Card an neih vek a ngaih thu a sawi a ni. GST hnuaiah online veka tih a nih tawh dawn avangin, sumdawngte’n accounts emaw books of accounts felfai taka an vawn a ngai tawh dawn a ni, a ti. Heng bakah hian GST hnuaia in register dan zirtirna a pe a ni.

Pu Lalthachianga, Asst. Commissioner chuan he programme hi a kaihruai a. GST hnuaia chhiah pek dan chungchang (Payment) zirtirna a pe a. Pu SK Lalhawngliana, Asst. Commissioner pawhin chhiah thar (GST) lak a nih dan tur leh a then dante a sawi a. GST Return (GSTR) thehluh dan leh GST hnuaia GSTR chi hrang hrang awmte sawifiahna a nei a ni.