2030/2024-2025

2024 Mimkut thla ni 12: India ram puma HIV (Human Immunodeficiency Virus) leh inpawlna aṭanga natna inkai chhawn theih Sexually Transmitted Infection (STI) dang dona atana inzirtirna hrang hrang kalpui tur beihpui, "Intensified IEC Campaign - India Fight Against HIV & STIs" chu Lunglei District tan vawiin khan Mizoram Sawrkara Health & Family Welfare Minister Pi Lalrinpuii chuan a hawng.

Government High School, Lunglei tuala Intensified IEC Campaign hawnna hun buatsaihah Health Minister Pi Lalrinpuii chuan Mizoram chu ruihhlovin a run mek tih sawiin, ruihhlo chuan mahni nun inthlahdahna a thlen a, chu chuan natna ṭha lo - HIV leh STI-te a tipung chak hle a ni, a ti a.  Mizorama HIV leh STI pung chak lutuk chuan thuneitute leh thawktute mang a ti-ang tak zet tih sawiin, HIV/AIDS do tur hian sawrkar chuan “State Council on AIDS” te tuai thar lehin, State Legislative Assembly-a MLA awm hmun thuma ṭhena hmun hnih lai telna - "Legislative Forum on HIV/AIDS" pawh din thar leh tumin Assembly Speaker phalna dila hma lak mek a ni, a ti a. He natna pung darh zel tur veng tur hian mi tinin nun uluk a, ruihhlo laka inven fimkhur leh kawppui thlan fimkhur chu tih tur pawimawh hmasa a ni tiin, he natna darh zel tur venna atana Intensified IEC Campaign ruahman hlawhtlinna tur chu mipuiteah a innghat a, Health department-a thawkte mai bakah, District Administration lam te, sawrkar hna thawk, sikul naupang, kohhran leh tlawmngai pawl te ṭan rualna a pawimawh a ni, a ti a. Intensified IEC Campaign-in a tum ber - mipui zawng zawng hnen thleng phak HIV leh STI natna dona kawnga inzirtirna theh darh a hlawhtlin ngei theih nan theih tawp chhuah ṭheuh turin hma latute chu a chah a ni.

Health Minister chuan Intensified IEC Campaign hnuaiah hian ṭhuang hrang hranga hma lakna tur ruahman a nih thu sawiin, thingtlang lama health worker-te, ASHA worker-te, grassroot worker-te phei chu in tin tlawh chhuakin an hah leh dawn hle a, health worker-te pawimawhna leh hlutna a lang chhuak chiang lehzual dawn a ni, a ti a.  Sawrkar pawhin health worker-te pawimawhna leh mipuite mamawhna hriain tun hnaiah health worker 51 lakna tur phalna a pe chhuak tih tar langin, thil ṭul angte bawhzuia hma lak mek a nih thu a sawi.

Lungleia Intensified IEC Campaign - India Fight Against HIV & STIs hawnna hunah hian Lunglei West bialtu MLA Pu T. Lalhlimpuia, Lunglei Municipal Council (LMC) Chairman Pu Lalzuithanga leh Vice Chairman Pu K. Lalrinawma, Lunglei District Bawrhsap Pu R. Lalṭhazuala, Lunglei District Senior Chief Medical Officer Dr LC Liana leh health department-a thawktute, sawrkar official dangte leh zirlaite an kal khawm a. Zirlaite'n HIV leh STI hlauhawmzia te, kai lo tura inven dan tur leh mipui zirtirna pawimawh hrang hrang thuziak kengin kawng zawh huaihawt nghal a ni a. Lunglei District AIDS Prevention & Control Committee (DAPCC) Chairman, District Bawrhsap Pu R. Lalṭhazuala chuan kawng zawh hi a vai liam a ni.

Vawiina HIV & STI dona puala kawng zawhah hian Red Ribbon Club pathum - Lunglei Government College, Govt J. Buana College leh Nursing School Lungleia zirlaite bakah, Govt High School, Lunglei; Govt Higher Secondary School, Lunglei; Govt Leitlangpui HSS; Govt Electric Veng H/S; Govt Bazar H/S; Southern Flower School; Christian Education Centre leh Bethesda HSS zirlaite an tel a. HIV dona atana mipui zirtirna thuziak anmahni siam ṭheuh kengin Govt High School tual aṭanga Lunglei Tennis Court hlui thlengin kawng an zawh a. Kawng zawh tawpna Tennis Court hlui hmunah hian Lunglei District AIDS Control Officer Dr K. Lalhmachhuana chuan lawm thu sawiin hun a khar a ni.

Lunglei District-ah hian Intensified IEC Campaign hi September ni 12 - 27, 2024 chhung kalpui tura ruahman a ni a. Hemi chhung hian zirna in hrang hrangah placard making competition, debate competition, photobooth competition, musical drama competition leh inzirtirna stall hrangte buatsaih tura ruahman niin, September ni 27, 2024 khian Govt J. Buana College-ah Campaign kharna leh lawmman semna buatsaih tura ruahman a ni bawk.