4276/2025-2026

Lunglei, 2026 Ramtuk thla ni 3: Vawiin khan DC Office, Health & FW leh I&PR official-te, Lungleia damdawi zuar (pharmacist)-te leh LushAITech ai awhte chu Lunglei District Bawrhsap Pi Navneet Mann kaihhruaiin a hna thawh pindanah an ṭhu khawm a. "Healthy Lunglei District Campaign" kal tlanga January ni 29, 2026-a tlangzarh tak, "LushAI Healthy Lunglei" Mobile App chu mipuite'n ṭangkai zawka an hman theih nana tihchangtlun dan tur leh tihlar dan tur an sawi ho.

Thawktute leh mipuite'n LushAI Healthy Lunglei app an hman dan report ngaihthlak niin, tihchangtlunna tur rawtna hrang hrang sawi ho a ni a. Ayushman Bharat Health Account (ABHA)-a inziah luhnaa siam rem ngai chu LushAITech lamin lo siam rem se tih niin, damdawi lei tur tan daktawrin damdawi a chawhna lehkha thil tel (upload) ngei ngei a ṭul avangin a dah luhna tur siam tel ni se, tih a ni a. Damdawi chahtute an duhna taka pek chilh (deliver) man felfai leh tlawm zawk a awm theih nan damdawi zuarte nen sawi ho va, ruahmanna siam ṭha tih a ni a. App tihchangtlun zel nan thawktute'n ngun zawka vil zui reng ni se, tih a ni.

Healthy Lunglei app hi Android Playstore aṭangin mi 160, Apple iOS App Store aṭangin mi 70, belh khawmin mi 230-in an phone-ah an dah lut (download) tawh tih tar lan a ni a. Mi tam zawkin an hman ṭangkai theih nan branch YMA leh college hrang hrangah te mawhphurtu bik (nodal officer) inruatin, nidal officer-te tan March thla laihawl velah inzirtirna buatsaih ni se, tih a ni a. App hmang ṭha zual YMA branch 3 leh college te tan lawmman siam ni se, tih a ni bawk.

LushAI Healthy Lunglei app hmang hian district chhunga sawrkar damdawi in leh health centre-a daktawrte ṭhut hun tur a en theih bakah, OPD-a inentir turin appointment a lak lawk (book) theih a. ABHA-a inziah luhna te, he app-a inziak lut damdawi dawr (pharmacy)-te aṭanga damdawi chah theihna te awmin, hriselna lama hriat tur pawimawh hrang hrangte pawh awlsam takin a hmuh theih a. OPD appointment laknaa pui thei tur leh zawhna hrang hrang Mizo ṭawnga chhang thei tur AI chatbot dah tel a ni bawk a. Android hmangte tan play.google.com/store/apps/details?id=com.lushaihealthylunglei.android aṭangin leh iOS hmangte tan apps.apple.com/in/app/lhl/id6755673586 aṭangin download theih a ni.