4277/2025-2026

Lunglei, 2026 Ramtuk thla ni 3: Vawiin khan Lunglei District Level Co-ordination Committee for National Deworming Day chu Lunglei District Additional Deputy Commissioner Pi Rochuangkimi Khenglawt hovin Lunglei DC Conference Hall-ah an ṭhu khawm a. National Deworming Day (NDD) February Round 2026 kalpui dan tur an sawi ho.

National Deworming Day hi kum tin vawi hnih, February thla leh August thlaah te hman ṭhin niin, kumin NDD February Round hi February ni 10 aṭanga hman ṭan tura ruahman a ni a. Naupang kum 1 aṭanga kum 19 inkarte chu rulhut hlo (Tab. Albendazole) eitir vek tura tih a ni a. Naupang kum 2 hnuai lamte chu mum chanvea eitir ṭhin niin, kum 2 chung lamte chu mum khat pek ṭhin an ni a. Rulhut hlo hi zirna in leh anganwadi centre-ah te pek leh tura ruahman niin, chumia hmaihte chu an ina kal chilha pek leh turin ruahman a ni.

NDD 2026 February round bul ṭanna leh hawnna hun hi February ni 10, 2026 (Thawhlehni) chawhma dar 10:30-ah Govt Middle School-I, Rahsiveng, Lungleiah (Govt Primary School-II, Rahsiveng nen inkawpin) hman tum a ni a. Hemi ni hian Lunglei District chhunga school, college leh anganwadi centre-ahte rulhut hlo inpek a nih dawn bakah, sikul kal lote chu ASHA-te'n an inah kal chilhin an pe ang a. Target zinga tel si, hemi nia pek hman lohte tan mop up day February ni 17-ah buatsaih a ni leh bawk ang.

NDD August 2025 round-ah khan Lunglei leh Hnahthial District chhunga rulhut hlo pek tur tinzawn (target) mi 52,617 aṭangin mi 52,091 (99%) chu rulhut hlo pek an ni a. Kumin NDD February round-a rulhut hlo pek tur atan hian Lunglei District chhungah kum 1 leh kum 19 inkar mi 44,526 tinzawn an ni.