1719/2024-2025

2024 Thlazing ni 23: Vawiin khan Lunglei District Bawrhsap Pu R. Lalṭhazuala hovin a office chamber-ah Healthy Lunglei District Campaign kalpui mek thlir ho niin, hma lak zui zel dan tur sawi ho a ni.

He hunah hian Additional Deputy Commissioner Pu James Miahlung chuan Healthy Lunglei District Campaign bul ṭan dan leh hma lak tawh chin tar langin, hmachhawp la awmte a sawifiah a. Member kal khawmte chuan Healthy Lunglei District Campaign hnuaia hma lak tawh china hlawhtlinna chu lawmawm an tih thu sawiin, District chhungah hriselna kawnga hmasawnna a thlen zel an beisei thu an sawi a. Huam zau leh hlawhtling zawka hma lak dan tura rawtna leh ruahmanna hrang hrangte an sawi ho nghal a ni.

Healthy Lunglei District Campaign hi Lunglei District-in hriselna lama hma a sawn theih nana ruahman niin, June ni 12, 2024 khan Health Minister Pi Lalrinpuii'n a hawng a. He campaign hnuaiah hian Lunglei khawpui chhungah natna inkai chhawn theih loh Non-Communicable Disease (NCD) chungchang inzirtirna leh hriselna dinhmun endikna (screening) buatsaih ṭhin niin, June ni 12 - August ni 21, 2024 inkar chhungin kohhran ṭhalai, pawl (association) hrang hrang leh sawrkar office hrang hrang zingah NCD Awareness & Screening ṭum 16 buatsaih tawh a ni a. Awareness-ah hian mi 1,745 telin, an zinga mi 1,255 (mipa 776 leh hmeichhia 479) chu an hriselna dinhmun endik nghal a ni a. He screening aṭang hian BP sang tih hriat chhuah thar 108 awmin, inhre sa endik nawn 144 an awm bawk.

NCD screening-ah hian kum 30 chung lam bik tinzawn niin, Lunglei khawpui chhunga kum 30 chung lam mi 23,673 zinga 3.9% chu Healthy Lunglei District Campaign kal tlang hian endik an ni tawh a. Fur zawh lamah Lunglei khawpui pawn lam tuam tura hma lak chhunzawm tum a ni.

Vawiin ṭhut khawmah hian Healthy Lunglei District Campaign kalpui zelna turah health programme dang leh department dang hma lakna nena kaih kawp theih dan tur te, programme pangngai buatsaih piah lama vantlang zinga information mike hmanga hriselna chungchang inzirtirna puanzar dan tur chungchang te sawi ho a ni bawk.