1718/2024-2025

2024 Thlazing ni 23: Vawiin khan Lunglei District Level NCORD Committee huaihawtin Lunglei DC Conference Hall-ah Lunglei khawpui chhunga damdawi dawr nei (pharmacist/general drug licence holder)-te koh khawm niin, ruihhlo dona kawnga mawhphurhna an neihte inhrilh tharna leh ruihhlo dona kawnga hma lak ho dan tur sawi hona buatsaih a ni.

He hun hi Lunglei District Additional Deputy Commissioner Pu James Miahlung chuan a kaihruai a. District Level NCORD Committee kal tlangin ruihhlo dona kawngah nasa taka hma lak a nih thu sawiin, ruihhlo hman khawloh venna pakhat atan damdawi dawrah leh sumo counter-ah te cctv vuah vek tura hriattirna chhuah a nih tawh thu leh thuneitute aṭangin endikna pawh kalpui a nih thu a tar lang a. Lunglei khawpui chhunga pharmacy-te chuan cctv vuah hi an zawm ṭha tih sawiin, an chungah lawm thu a sawi a ni.

He hunah hian DC office, Food & Drug Administration, Excise & Narcotics leh Police lam aṭanga official kalte'n ruihhlo hman khawloh venna leh ruihhlo hluar zel tur venna kawnga damdawi dawrte mawhphurhna sawiin, hemi kawnga hriat tur leh zawm tur thil pawimawh hrang hrang an sawi a. Damdawi ruih theih hralh chhuah chungchanga fimkhur a ṭul thu leh kum tling lo hnena pek chhuah loh tur a nih thu te, damdawi dawra cctv vuah vek tur tih chu ṭha taka zawm a pawimawh thu leh Schedule H drug prescription register vawn ṭhat a ṭul thu te inhrilh nawn niin, damdawi dawr neite chu damdawi an zawrh theih loh chin kawl lo tura chah nawn an ni a. Damdawi ruih theih chi hman khawloh venna kawngah damdawi zuarte chu a veng theitu ber an nih angin, anmahni an fihlim piah lamah dan lova thil tite thlithlai a, thuneitute hnena thlen ṭhin turin an chah bawk.

He hunah hian damdawi zuar kal khawmte nen ruihhlo dona kawnga hma lak ho dan tur hrang hrang sawi ho a ni a. Damdawi zuarte'n an damdawi kawl leh hralh chhuahte an chhinchhiahna register felfai taka vawn dan tur inzirtir a ni bawk.