632/2025-2026

Lunglei, 2025 Ṭomir thla ni 16: Nizan, May ni 15, 2025 (Ningani) dar 8:30 leh dar 8:35 inkar chhung khan Lunglei khawpui chhungah hlawhtling takin civil defence blackout drill (a ruala êng tihthim ṭhiap) buatsaih a ni a, mipuiin an zawm ṭha hle.

Blackout drill hi India ram puma Civil Defence System dinhmun enna tur leh a taka vansang aṭanga beih tawh palh pawha hmelma laka himna atana chet lak dan tur inzirtirna leh inralrinna atana ruahman a ni a. Lunglei Municipal Council (LMC) huam chhung veng 24-ah kalpui niin, zan dar 8:30 aṭangin veng tinah YMA (Young Mizo Association) tlangauna kal tlangin minit khat chhung ralkhel dar (siren) tihrik a ni a. Zan dar 8:30-ah chiah Power & Electricity Department te'n kawlphetha (power) titawpin, hemi rual hian mipuite'n inverter, generator leh solar hmanga êng chhit zawng zawng an tithim vek bawk a. Khawpui chhung hmun hrang hranga ni tha chakna hmang tual khawnvar (solar street light) te chu local council te'n chhun lamah mahni veng chhunga mi ṭheuh lehkhakhawng leh thil dang hmangin êng chhuak tlang thei lo turin an lo khuh lawk tawh bawk a. Khawpui chhung hmun hrang hrangah lirthei thunun turin traffic police te inzar pharhin, blackout lai hian lirthei tlan laite pawh an awmna hmuna an din nghal bakah, minit nga chhung hian a khawl leh êng pawh tihthih vek a ni a. Kohhran, pawl hrang hrang leh mimal tih tur ruahman sa neite pawh blackout mila insiam remin, biak in aṭanga Bible chhiar chhuakte pawh an chawl lailawk a. Damdawi in chenin blackout hi an zawm a ni.

Lunglei District Disaster Management Authority (DDMA) Chairman, District Bawrhsap Pi Navneet Mann chuan Lunglei khawpui chhungah hlawhtling taka blackout buatsaih a ni chu lawmawm a tih thu sawiin, blackout hlawhtlinna atana tha thawhtu - department/institution hrang hrangte, Local Council, YMA leh NGO dang, kohhran leh MJA te bakah, sawrkar thuneitute ruahmanna ṭha taka zawma thlawptu Lunglei mipuite chungah lawm thu a sawi a ni.