631/2025-2026

Dated Serchhip, the 16^th May, 2025: Nizan khan Serchhip DC Pu Paul L Khuma kaihhruaina hnuaiah Civil Defence Mock Drill ‘Operation Abhyas’ leh Blackout Drill hlawhtling taka neih a ni a. Serchhip mipui ten blackout hi an zawm tha hle.

Tun hnaia India leh Pakistan indona in a nghawng kal zelah India sawrkar chuan indo a thlen thulha mipui inbuatsaih tul tiin India ram khawpui engemawzatah Civil Defence Mock Drill ‘Operation Abhyas’ leh Blackout Drill neih a ni a. Serchhip District Civil Defence Committee ruahmanna angin Serchhip khawpui chhung bakah East Lungdar leh North Vanlaiphaiah hlawhtling takin neih a ni.

‘Blackout Mock drill’ hi zan dar 8:29-ah tanin YMA Branch tin Information Centre atangin Siren tih rik a ni a. Zan dar 8:30-ah P&E chuan khawpui chhunga eng pek an titawp a, solar/Inverter/power backup nei ten an off a, motor tlan lai te pawh an awm hmunah dingin, motor light leh engine te an off a. Solar Street Light te pawh a theih chin chinah khuhin zan dar 8:35 thleng eng tihthim a ni. He Blackout Mock drill hi Serchhip mipui ten an zawm tha hle a, khawlaia mipui chhuakvak leh lirthei tlan vel pawh an tlem phah hle a ni.

Hmelma thlawhna -Jet fighter in Serchhip khawpuia IOC petrol pump a bomb chhia anga nunchan zirin Civil Defence Mock Drill chu 8:35pm atanga tanin neih chhunzawm nghal a ni a. He hunah hian Van chung sang atangin thlawhna-in IOC petrol pump chu rawn kapin, kangmei nasa tak chhuak anga lemchan a ni a. Additional DC Pu Lalrinzuala leh Additional SP Pu Saidingliana Sailo te kaihhruaina hnuaiah Search & Rescue Team -Serchhip District QRT te, Fire & Emergency Service te, Police te, Assam Rifles leh BSF te an che chhuak a. Fire Tender ten kangmei an thelh a, Serchhip District Hospital atanga lo tlan Ambulance te chuan thi leh hliam tuar lem chang te an phurchhuak a ni.

Mock Drill neih zawh hnu hian Serchhip DC Office tualzawlah inhmuhkhawm niin mock drill thlir letna hun an hmang a. Indona lo thleng tak tak ta se eng laiah nge inbuatsaihna tha tawk lo nia an hmuh te an sawiho nghal a ni.