28/2024-2025 

LUNGLEI; the 3^rd April, 2024: Vawiin chawhma dar 11:00 khan BCM Hall, Serkawnah  hmeichhe hlang polling officials: Presiding Officer(PRO),Asst.PRO leh Polling Officer (PO)  an vaiin mi 111 te tan training buatsaih a ni. Lunglei district-ah hian Polling station 176 awmin, chung zinga Polling Station 24 chu hmeichhe hlangin an vil tur a ni. Heng polling officials 111 te zingah a thlaveng tur (reserved) 20%  an tel nghal  a ni.

Training hawnna inkhawm tawiah District Election Officer leh Bawrhsap ni bawk Pi Ramdinliani chuan telpuiin, trainee te fuihna thuchah a sawi. Pi Ramdinliani chuan hmeichhia te hi awmnem zawk mah ni ila, kan thiltihah kan uluka, rilru pe taka thil tih thin kan nih avangin Election duty-ah hian hmeichhe polling official che felfai loh leh buarchuar hi kan awm ngai hauh lo a ni. Chuvangin vawiinah kan Polling official te paw’n uluk taka in training chuan, bel taka inthiam leh vek ka beisei a. Lok Sabha Inthlanpuiah in mawhphurhna theuh te hneh tak leh  tha taka inhlenchhuah leh ngei  beiseina sang tak ka nei a ni.  Rilru pe tak leh uluk takin training u la, Lunglei district-a Lok Sabha inthlanpui felfai leh thianghlim tak thlentirtu hmanraw pawimawh tak ni theuh turin duhsakna ka hlan a che u, a ti.

Vawiin Training-ah hian  Pu C.Lalrindika, Assembly Level Master Trainer (ALMT) chuan resource person niin training hi a pe a ni.