Vawiin khan ni thum awh (12th-14th Feb 2020) Horticulture Lunglei Division leh Mizoram Florist Association, Lunglei te tangkawp buatsaih ‘Horticulture Exhibition 2020’ chu tluang taka zawhfel niin Dr K. Pachhunga, MLA, Vice Chairman Bamboo Development Board chuan kharna hun hi a hmanpui. He hunah hian Horticulture Department thawktute bakah sawrkar department dang official-te, media mite leh kuthnathawktu mi thahnem tak an tel a ni.

Kharna inkhawm Pu L. Lalhmingmawia Pachuau, Lunglei DHO kaihhruaiah Dr K. Pachhunga chuan Horticulture Department leh Mizoram Florist Association ten kuthnathawktute leh entrepreneur-te hmakhua ngaia anmahni chawk phur tur leh an tharchhuahte hralhna hun hlu tak an buatsaih sak chu lawmawm a tih thu a sawi a. Mizoramin ei leh bara  kan intodelhna theihna tura hmalakna kal mekah Horticulture Department chu a pawimawh takzet a ni tiin pesticide leh damdawi dang hmang lova thlai thar te kan inzirtir zel a tul a ni tiin Mizoram sawrkarin uar taka Organic Farming kalpui a tum thu a sawi a. Kuthnathawktute leh entrepreneur hlawhtlingte taimakna leh tumruhna chu fakawm leh entawntlak a tih thu sawiin thawh hreh nei lova eng hna pawh taima leh rinawm taka kan thawh chuan kan ram economy pawh chak takin a thang dawn a ni, a ti.

A sawi zelnaah Bamboo Development Board Vice Chairman chuan tun kar mai khan Commerce and Industries Minister Dr R.Lalthangliana hova India leh Bangladesh insumdawn tawnna tur hmun ICP Kawrpuichhuah an tlawh thu leh he ICP hi ti puitling tura sawrkarin chak taka hmalak zel a tum thu a sawi a. He ICP kaltlang hian kuthnathawktute pawhin ram dangah an tharchhuahte man man zawkin an hralh chhuak thei dawn a ni, a ti.  Mizoram SEDP Healthcare Scheme chungchang pawh sawilangin MSHCS-a inziah luh man hi BPL chhungkaw tan Rs 100/- niin, APL chhungkaw tan Rs 1,000/- niin chhungkaw khatin kum khatah damdawia inenkawlna senso Rs 2,00,000/- (nuai hnih) thleng an bill thei dawn a ni tiin he scheme hi lo ngaihven leh hmang tangkai ve turin kalkhawmte a chah a ni.

Pu Tlangtimawia Zote, DAO leh Pi V. Lalchhuanmawii, President Mizoram Florist Association Lunglei te pawhin thu sawiin  Pu VL Remruatpuia, SDHO Hnahthial in lawmthu sawina hun a hmang a ni. 

‘Horticulture Exhibition 2020’ ah hian Lunglei District-a kuthnathawktute tharchhuah thlai leh pangpar chi hrang hrang Category 40 hnuaiah item 375 pho chhuah an ni a. Category tinah hian lawmman pakhatna atanga pathumna buatsaih a ni. Pakhatna hian cheng sang khat (Rs. 1000/-), pahnihna in cheng za sarih (Rs. 700/-) leh pathumna in cheng za nga (Rs.500/-) an dawng a ni. Lawmman semna hun buatsaih nghal niin King of the Show ah Anonto, Tipperaghat (mai) leh Queen of the Show ah Pi Lalhmingmawii Poonte, Lunglawn (Saron par) te thlan an ni. 

Horticulture Exhibition-ah hian kuthnathawktuten Rs. 3,29,370/- man an tharchhuah an hralh a ni. 

Attachment

  • Loading attachment...