Vawiin khan Champhai District Hospital OPD-ah Valentine’s Day pualin thisen pek runpui Association for Voluntary Blood Donation (AVBD) Champhai, Blood Bank, District Hospital Champhai leh MSACS-te tangkawp bultumin neih a ni a. He hun ‘Show love, Give Blood’ tih thupui hmanga huaihawtah hian Pu Rex Zarzoliana Vanchhawng, SP Champhai chu khuallian niin thisen pek runpui hi a hawng a ni.

Khuallian Pu Rex Zarzoliana Vanchhawng chuan thusawiin Valentine’s Day denchhena thisen pek runpui AVBD Champhaiin an buatsaih chu lawmawm a tih thusawiin, thisen pek leh Valentine’s day chu thil inhmehtak a nih thu a sawi a. Thisen pe tura pawimawh ber chu hmangaihna a ni a, hmangaihna dik loh avanga thisen chhuak chuan thil pawi tak a thlen theih laiin hmangaihna dik tak atanga thisen chhuak chuan mite tan damna a thlen thin a ni, a ti a. He hunah hian Champhai SP chuan mipuite chu social media kaltlanga thuvawrh darhte finfiah anih hma chuan ring lo tur leh Chanchinbumite pawh mipuite thu dik leh rintlak zirtir kawnga tan la lehzual turin a chah a. Thisen pe turin hrisel a ngaih thu pawh sawiin, thisen pek tum zingah hriselnain a tlin loh avanga pe thei lo tam tak an awm thin chu pawi a tih thu a sawi a. Hrisel lohna tam tak chu insum theih loh leh inthunun theih loh vang a ni thin a, mi dangte tanpuitu ni thei turin hriselna ngaipawimawha, damlo mangangte'n thisen an mamawh ang an hmuh theihna tura Damdawi In lama thawktute thawhpui zel turin mipuite a ngen a ni.

Dr. J. Lalramchhuanga, Consultant, District Hospital Champhai chuan Champhai District Hospital Blood Bank-in thla tin thisen Unit 90-120 inkar a mamawh thu a sawi a. Voluntary Blood donation atang lo chuan Blood bank hi kal thei anih loh thu tarlangin, tlawmngai pawl, Kohhran thalaite leh mimal ten thisen an pek atang chauhin a kal hram hram a ni, a ti a. Mizote zinga thisen petute chu Kohhran thalai, tlawmngai pawl leh mi hrisel tak takte an nih thin avangin Mizote chu khawvela thisen dawng thianghlim berte zing a mi kan nih thu a sawi a. Dr. J. Lalramchhuanga chuan khawvel thiamnain thisen leh a tlukpui a siam theih loh avangin thisen mamawhte chu thisen vek lo chuan an dam thei lova, thisen pek hi kan uar thar deuh deuh a ngai a ni, a ti a. Mihausa leh rethei, mi lian leh mi te te pawhin kan thilpek hlu ber in ang tlanga kan pek theih chu thisen hi a ni tiin, damlo thisen mamawhte thisen pe a enkawlpui turin mipuite a sawm a ni.

Vawiin hun hi Dr. Zatluanga, Medical Superitendent & President, AVBD Champhai District chuan a kaihruai a. Pu C. Zaihmingtthanga, Secretary, AVBD-in pawl hmalakna report a pe a. Pu RL Chhuanawma, AVBD Champhai President-in lawmthu sawina neiin hun a khar a ni. Programme neih lai leh zawh hnu hian a duh apingte tan thisen pekna hun hawn a ni a, vawiina thisen pek zawng zawng hi Unit 113 niin, Mipa 82 leh Hmeichhia 31 te’n an thisen hlu tak chu midangte tana malsawmna ni turin an pe a ni.