1252/2024-2025

2024 Vawkhniahzawn thla ni 22: Vawiin khan Lunglei DC Conference Hall-ah Lunglei District Bawrhsap Pu R. Lalṭhazuala hovin Lungleia Independence Day 2024 hman dan tur rel a ni a. Sawrkar official-te, zirna in, pawl hrang hrang leh kohhran ai awhte an tel.

Chairman Pu R. Lalṭhazuala chuan member kal khawmte lawmna thu sawiin, ram ni pawimawh chu sawrkar department emaw, pawl bik emaw ta a ni lo va, ram mipui zawng zawng ta a nih angin a hlawhtlinna kawngah mawh kan phur ṭheuh a ni, a ti a. Independence Day hlawhtling taka hman a nih theih nan memeber kal khawmte chu ngunthluk taka ngaihtuahna seng tura chahin, department, zirna in, pawl, kohhran leh mimal chanvo leh mawhphurhna pekte chu an chanvo ṭheuh ṭha taka hlen chhuah tum turin a chah a ni.

He hunah hian Additional Deputy Commissioner Pi Rochuangkimi Khenglawt chuan kum hmasa lama Lungleia ram ni pawimawh hman ṭhin dan tlangpui a tar lang a. Kum 2024-a Independence Day hman dan tur sawi ho niin, department leh tlawmngai pawlte kovah mawhphurhna hrang hrang nghah a ni.

Meeting chuan kumin Independence Day lawmna hi C. Ṭhuamluaia Mualah August ni 15, 2024 (Ningani) zing dar 9:00-ah hman ni se, tiin a rel a. PWD Minister Pu Vanlalhlana chu Khuallian tura beisei a ni a. Independence Day lawmna ceremonial parade buatsaih ṭha tih niin, ruahmanna siam turin SP leh DEO te kutah mawhphurhna dah a ni a. Circuit House-ah VIP At Home buatsaih ni se, tih a ni bawk.

Lunglei District-a chhawmdawlna in, damdawi in leh District Jail-ah te Independence Day pual ṭanpuina thilpek pek leh ni se, tih a ni a. Sports discipline ṭhenkhat (football, table tennis, carrom & snookers/billiards) te'n Independence Day 2024 puala inelna (tournament) buatsaih tura Independence Day Celebration Committee-a sum an dilna pawh thlir ho niin, tournament buatsaih hi remtihsak an ni bawk.

Independence Day ni-ah hian sawrkar office, zirna in leh sawrkar quarters-ah te India ram puanzar zar vek tura tih a ni a. Sawrkar hna thawkte chu Independence Day lawmnaah hian tel ngei tura beisei niin, mipuite pawh Independence Day lawmnaa tel vek turin Lunglei District Independence Day Celebration Committee chuan a sawm nghal a ni.